Hardik Patel: నిన్న కాంగ్రెస్‌కు గుడ్‌బై.. నేడు ఘాటు వ్యాఖ్యలు..

కాంగ్రెస్‌ పార్టీకి షాక్‌ ఇస్తూ నిన్న రాజీనామా చేసిన హార్దిక్‌ పటేల్.. ఇవాళ ఆ పార్టీపై ఘాటు వ్యాఖ్యలు చేశారు.. రాజీనామా చేసిన మరుసటి రోజే కాంగ్రెస్ ‘అత్యంత కులతత్వ పార్టీ’ అంటూ మండిపడ్డారు.. ఇవాళ మీడియాతో మాట్లాడిన ఆయన.. ‘అతిపెద్ద కులతత్వ పార్టీ’ కాంగ్రెస్‌ అని పేర్కొన్నారు.. రాష్ట్ర పార్టీలో తనకు ఎటువంటి విధులు కేటాయించలేదని ఆరోపించారు. ఎగ్జిక్యూటివ్ చైర్మన్ బాధ్యతలు కాగితాలపైనే ఉన్నాయని.. రెండేళ్లుగా నాకు ఎలాంటి బాధ్యతలు ఇవ్వలేదని మండిపడ్డారు.

మరోవైపు.. కాంగ్రెస్‌కు రాజీనామా చేయడంతో బీజేపీలో చేరతారా? అనే ప్రచారం కూడా సాగుతున్న విషయం తెలిసిందే కాగా.. తాను భారతీయ జనతా పార్టీ (బీజేపీ)లో చేరుతానన్న చర్చలను హార్దిక్ పటేల్ తోసిపుచ్చారు. బీజేపీలో చేరే విషయమై ఇప్పటి వరకు ఎలాంటి నిర్ణయం తీసుకోలేదని స్పష్టం చేశారు. గతంలో కాంగ్రెస్ గురించి హెచ్చరించిన పాటిదార్ నేతలకు క్షమాపణలు చెప్పారు. నేను సీనియర్ పాటిదార్ నాయకులు మరియు స్నేహితులకు క్షమాపణలు చెబుతున్నాను. వారు నన్ను కాంగ్రెస్‌లో చేరవద్దని హెచ్చరించారు.. నేను ఈ రోజు ఆ విషయాన్ని గ్రహించానన్నారు.

ఇక, కాంగ్రెస్ పార్టీ అవినీతికి పాల్పడుతోందని ఆరోపించారు పాటిదార్ నేత హార్దిక్‌ పటేల్.. రాహుల్ గాంధీ దాహోద్ ఆదివాసీ సత్యాగ్రహ ర్యాలీలో దాదాపు 25 వేల మంది హాజరయ్యారని, అయితే 70 వేలకు బిల్లు పెట్టారని, కాంగ్రెస్‌లో అవినీతి ఏ స్థాయిలో ఉందో అర్థం చేసుకోవచ్చు అన్నారు. రాహుల్ గాంధీ గుజరాత్‌లో పర్యటించినప్పుడు రాష్ట్రానికి సంబంధించిన ఒక్క అంశంపై కూడా చర్చ జరగలేదని విమర్శించారు. రాహుల్ గాంధీ ఇక్కడికి వస్తే ఏ చికెన్ శాండ్‌విచ్ ఇవ్వాలో, ఏ డైట్ కోక్ ఇవ్వాలో కాంగ్రెస్ నేతలు చర్చించుకుంటున్నారు. కుల రాజకీయాలు తప్ప మరేమీ జరగదని ఘాటు వ్యాఖ్యలు చేశారు.