CM Vijay: పెరియార్ ఆదర్శమే, కానీ దేవుడిపైనే మా నమ్మకం..

CM Vijay: తమిళనాడు ముఖ్యమంత్రి సి. జోసెఫ్ విజయ్ తన పార్టీ టీవీకే సిద్ధాంతాన్ని మరోసారి స్పష్టం చేశారు. ద్రావిడ రాజకీయాలకు కేంద్రంగా ఉన్న పెరియార్ సూత్రాలను అనుసరిస్తూనే, నాసికత్వం, మత విశ్వాసాలను తిరస్కరించే ఆయన సిద్ధాంతాలను అంగీకరిచమని చెప్పారు. పెరియార్ సామాజిక సూత్రాలను తమ పార్టీ టీవీకే అనుసరిస్తుందని చెప్పారు. అసెంబ్లీలో గవర్నర్ ప్రసంగంపై ధన్యవాద తీర్మానం సందర్భంగా సీఎం విజయ్ ఈ కామెంట్స్ చేశారు. మత విశ్వాసాలను ఖండించాలన్న పెరియార్ అభిప్రాయాన్ని అంగీకరించబోమని, తాము దేవుడిని విశ్వసించే వాళ్లమని చెప్పారు. తాము ఎవరి సిద్ధాంతాలకు వ్యతిరేకం కాదని చెప్పారు.

సమాన అవకాశాలు, సామాజిక న్యాయం అనే డాక్టర్ అంబేద్కర్ ఆదర్శాలను తన ప్రభుత్వం అనుసరిస్తుందని, తమిళనాడు మాజీ సీఎం కే. కామరాజ్ నిజాయితీలో కూడిన పాలనా నమూనాలను పాటిస్తుందని చెప్పారు. తాను కేవలం నటుడని విమర్శించే వాళ్లకు సమాధానం ఇస్తూ.. చాలా మంది ముందుగా రాజకీయ పార్టీ స్థాపించిన తర్వాతే ప్రజల్లోకి వెళ్తారని, కానీ తాను ముందుగా ప్రజల్లోకి వెళ్లి తర్వాత పార్టీ ఏర్పాటు చేశానని చెప్పారు. తాను క్షేత్రస్థాయిలో ప్రజల కష్టసుఖాలను చూశానని అన్నారు. తన ప్రభుత్వ పరిపాలన వ్యవస్థను మాజీ సీఎంలు సి.ఎన్. అన్నదురై, ఎం.జి. రామచంద్రన్ (ఎంజీఆర్) ప్రభుత్వాలతో పోల్చారు. అన్నదురై ప్రభుత్వం సామాన్య ప్రజల ప్రభుత్వమని, ఎంజీఆర్ ప్రభుత్వం అత్యంత సామాన్య ప్రజల ప్రభుత్వమని, అదేవిధంగా విజయ్ నేతృత్వంలోని ఈ ప్రభుత్వం 2026 ఎన్నికలలో మత, కుల భేదాలన్నింటినీ బద్దలుకొడుతూ అత్యంత సామాన్య ప్రజల ప్రభుత్వమని ఆయన అన్నారు.