Vishal Vishnu : విష్ణు విశాల్ తో రవితేజ ‘మట్టి కుస్తీ’
ఈ మధ్య ‘ఎఫ్.ఐ.ఆర్.’ సినిమాతో సందడి చేసిన తమిళ హీరో విష్ణు విశాల్ ‘మట్టి కుస్తీ’ చేయబోతున్నాడు. ఈ తాజా చిత్రానికి సంబంధించిన మోషన్ పోస్టర్ విడుదలయింది. మంగళవాయిద్యాలతో శుభకరంగా ఈ పిక్ మొదలవుతుంది. ‘వీరా వెడ్స్ కీర్తి’ అనీ కనిపిస్తుంది. ఓ వైపు పెళ్ళితంతు, మరోవైపు కుస్తీ పోరుకు సంబంధించిన ఇమేజెస్. చివరలో ‘మట్టి కుస్తీ’ టైటిల్ దర్శనమిస్తుంది. ‘ఎఫ్.ఐ.ఆర్.’ చిత్రానికి మాస్ మహారాజా రవితేజ సమర్పకునిగా వ్యవహరించారు. ఈ సినిమాకు కూడా రవితేజ సమర్పకుడు కావడం విశేషం. ఈ సినిమా విష్ణు విశాల్ సొంత చిత్రం. చల్లా అయ్యవు దర్శకత్వం వహిస్తున్న ఈ సినిమాకు జస్టిన్ ప్రభాకరన్ సంగీతం సమకూరుస్తున్నారు.
‘మట్టి కుస్తీ’ మోషన్ పిక్ ను తన సోషల్ మీడియాలో రవితేజ విడుదల చేస్తూ, “ఆటల చుట్టూ తిరిగే కథలతో రూపొందే చిత్రాలంటే తనకెంతో ఇష్టమని, క్రీడా నేపథ్యంలో వినోదం పంచబోతున్న ఈ చిత్రాన్ని సమర్పించడం ఆనందంగా ఉందని” ట్వీట్ చేశారు. మరి రవితేజకు, విష్ణు విశాల్ కు ఉన్న అనుబంధమేమిటో కానీ, మొత్తానికి ‘మట్టి కుస్తీ’ మోషన్ పిక్ ఆకట్టుకొనేలా ఉంది. ఈ ‘మట్టి కుస్తీ’ ఎప్పుడు ఎలా మొదలై, ఏ తీరున తెరకెక్కి, ఏ రీతిన జనం ముందు నిలుస్తుందో చూడాలి.