Dimple Hayati: డింపుల్ ఇంట్లోకి అపరిచుతులు… లిఫ్ట్ వరకూ తరిమిన కుక్క

గత కొన్ని రోజులుగా తెలుగు ఫిలిం ఇండస్ట్రీలో, తెలుగు మీడియాలో వినిపిస్తున్న పేరు డింపుల్ హయాతి. హైదరాబాద్ ట్రాఫిక్ డీసీపీ రాహుల్‌ హెగ్డే‌తో వివాదంతో వార్తల్లో నిలిచిన ఈ హీరోయిన్ సోషల్ మీడియాలో ట్రెండ్ అవుతోంది. పోలీసులు డింపుల్ పైన కేసు కూడా ఫైల్ చేసారు. ఇలాంటి సమయంలో ఉత్కంఠకి తెర లేపుతూ డింపుల్ ఇంట్లోకి ఇద్దరు అపరిచితులు ప్రవేశించారు. హైదరాబాద్‌ జర్నలిస్ట్‌ కాలనీలో ఉంటున్న డింపుల్ హయతి ఇంట్లోకి గురువారం ఓ అబ్బాయి అమ్మాయి ప్రవేశించారు. వారిని గమనించిన పనిమనిషి ఎవరని ఆరా తీసే ప్రయత్నం చేసింది. ఈ సమయంలో డింపుల్ పెంపుడు కుక్క ఆ అపరిచితుల వెంట పడింది. దీంతో భయపడిన వాళ్లు ఇంట్లో నుంచి బయటకి వెళ్లిపోయారు, డింపుల్ పెంపుడు కుక్క వారిని లిఫ్ట్ వరకూ తరుముకుందని సమాచారం.

Read Also: Dimple Hayathi: డింపుల్ ప్రాణాలకు హాని ఉంది.. డీసీపీ బెదిరిస్తున్నాడు..?

విషయం తెలుసుకున్న డింపుల్‌ వెంటనే డయల్‌ 100కు సమాచారం ఇవ్వడంతో అక్కడికి చేరుకున్న జూబ్లీహిల్స్‌ పోలీసులు యువతీ యువకుల్ని అదుపులోకి తీసుకొని స్టేషన్ కి తరలించారు. పోలీసుల విచారణలో రాజమండ్రి నుంచి వచ్చామని, డింపుల్‌ అభిమానులమని వివరించారు. ఇటీవల జరిగిన ఘటనల నేపథ్యంలో డింపుల్‌ను పరామర్శించడానికి వచ్చినట్లు పోలీసులకు తెలిపారు. పోలీసులు ఆ సమాచారాన్ని డింపుల్ కి ఇన్ఫార్మ్ చేసి ఆమె ఇంట్లోకి ప్రవేశించిన వారిని విడిచిపెట్టారు. డింపుల్‌ ఇంట్లోకి ప్రవేశించిన యువతీ యువకుల్ని కొప్పిశెట్టి సాయిబాబు, అతని బంధువు శృతిగా గుర్తించారు. వారిద్దరికి పోలీసులు కౌన్సెలింగ్‌ ఇచ్చి విడిచి పెట్టారు.