టాలీవుడ్ స్టార్ సుధీర్ బాబు త్వరలో మరో మాస్ ఎంటర్టైనర్ తో ప్రేక్షకుల ముందుకు రానున్నాడు. ‘కథలో రాజకుమారి’ ఫేమ్ దర్శకుడు మహేష్ సూరపనేని దర్శకత్వంలో రూపొందుతున్న ఈ ప్రాజెక్ట్ ను తాత్కాలికంగా “సుధీర్ 16” పేరుతో పిలుచుకుంటున్నారు. నిన్న ఈ సినిమా లాంఛనంగా పూజా కార్యక్రమాలతో ప్రారంభం అయ్యింది. సోషల్ మీడియా ద్వారా సుధీర్ బాబు ఈ విషయాన్ని అభిమానులకు తెలియజేశాడు. ఇన్స్టాగ్రామ్లో సుధీర్ బాబు “ఇది ప్రారంభమైంది… ఈ అద్భుతమైన టీమ్తో కలిసి పని చేయడానికి ఎదురు చూస్తున్నాను!! #Sudheer16 సెట్స్పైకి వెళ్లడానికి ఆతృతగా ఉన్నాము! టార్గెట్ సెట్!!” అంటూ సినిమా లాంచ్ ఫోటోలను పంచుకున్నాడు. అంతకుముందు సుధీర్ బాబు తన అభిమానులకు ఆసక్తిని రేకెత్తించే పోస్టర్తో ఈ సినిమాను ప్రకటించాడు. పోస్టర్లో అసాల్ట్ రైఫిల్స్, మెషిన్ గన్లు పద్దతిగా అమర్చి, పోలీస్ స్టేషన్లోని పకడ్బందీ విభాగంలో వాటిని ఉంచారు. ఈ సినిమాలో సుధీర్ బాబు పోలీసు పాత్రలో కనిపిస్తాడు. మిగతా వివరాలను త్వరలోనే వెల్లడించనున్నారు. ఈ కమర్షియల్ యాక్షన్ ఎంటర్టైనర్ లో శ్రీకాంత్తో పాటు ‘ప్రేమిస్తే’ ఫేమ్ భరత్ కీలక పాత్రలో కన్పించనుండగా, ఈ చిత్రాన్ని భవ్య క్రియేషన్స్ బ్యానర్పై వి ఆనంద్ ప్రసాద్ నిర్మిస్తున్నారు. మార్చి 14 నుంచి షూటింగ్ ప్రారంభమవుతుంది.
Read Also : SVP Song Leaked : పనిస్తే ఇలాంటి పని… వాడికి తెలియాలంటూ తమన్ ఎమోషనల్
ఇక మరోవైపు సుధీర్ బాబు కృతి శెట్టితో కలిసి నటించిన రొమాంటిక్ కామెడీ “ఆ అమ్మాయి గురించి మీకు చెప్పాలి” విడుదలకు సిద్ధంగా ఉంది. మోహన్ కృష్ణ ఇంద్రగంటి దర్శకత్వం వహించిన ఈ చిత్రం వారిద్దరి కాంబోలో వచ్చిన హ్యాట్రిక్ మూవీ. ఇంతకుముందు వీరిద్దరూ కలిసి సమ్మోహనం, వి వంటి హిట్ చిత్రాలను అందించారు. మైత్రీ మూవీ మేకర్స్, బెంచ్మార్క్ స్టూడియోస్ నిర్మించిన ఈ చిత్రం ఫిబ్రవరి 14న ప్రేమికుల రోజున వెండితెరపైకి రానుంది.
