ఈ నెలాఖరులో శ్రీనివాసరెడ్డి, సప్తగిరి ‘హౌస్ అరెస్ట్’!

ప్రముఖ కమెడియన్ శ్రీనివాసరెడ్డి ఇప్పుడు హీరోగానూ పలు చిత్రాలలో నటిస్తున్నాడు. మరికొన్ని సినిమాల్లో కీలక పాత్ర పోషిస్తున్నాడు. ఇటీవలే శ్రీనివాసరెడ్డి నటించిన ‘ముగ్గురు మొనగాళ్ళు’ చిత్రం విడుదలైంది. ‘ప్లాన్ బి’ రిలీజ్ కు రెడీగా ఉంది. ఈ నేపథ్యంలో అతను కీలక పాత్ర పోషించిన మరో సినిమా ‘హౌస్ అరెస్ట్’ ఈ నెల 27న విడుదల కాబోతోంది. సినిమా పంపిణీ రంగంలో ఉన్న కె. నిరంజన్ రెడ్డి చిత్ర నిర్మాణ రంగంలోకి అడుగుపెట్టి, తొలియత్నంగా ‘హౌస్ అరెస్ట్’ మూవీని నిర్మించారు. ’90 ఎం. ఎల్.’ ఫేమ్ శేఖర్ రెడ్డి ఎర్రా దీనికి దర్శకత్వం వహించాడు. ఈ మూవీలో శ్రీనివాసరెడ్డి, సప్తగిరి కీలక పాత్రలు పోషించగా రవిబాబు, ‘అదుర్స్’ రఘు, రవిప్రకాశ్, తాగుబోతు రమేశ్, ఫ్రస్టేటెడ్ సునైన, కౌశిక్ తదితరులు ఇతర ప్రధాన పాత్రలు చేశారు. ఈ చిత్రాన్ని ఓటీటీలో విడుదల చేయమని కొందరు సలహా ఇచ్చినా, కాదని థియేట్రికల్ రిలీజ్ కే తాము సిద్ధపడ్డామని నిర్మాత తెలిపారు. ఈ నెల 27న ఈ వినోదాత్మక చిత్రాన్ని విడుదల చేస్తున్నట్టు చెప్పారు. అనూప్ రూబెన్స్ సంగీతం సమకూర్చిన ఈ చిత్రానికి జె. యువరాజ్ సినిమాటోగ్రఫీని అందించారు.