Veta: ‘పెదరాయుడు’ లాంటి పవర్‌ఫుల్ పాత్రలో కేఎస్ రవికుమార్.. సంచలన ప్రాజెక్ట్ షురూ!

మెగాస్టార్ చిరంజీవి కెరీర్‌లో సూపర్ హిట్ గా నిలిచిన ఐకానిక్ టైటిల్స్ కు టాలీవుడ్‌లో ఉండే క్రేజ్ అంతా ఇంతా కాదు. తాజాగా చిరంజీవి నటించిన క్లాసిక్ టైటిల్ ‘వేట’ ను ఓ కుర్ర హీరో తన సినిమా కోసం ఫిక్స్ చేయడం ఇండస్ట్రీలో ఆసక్తికరంగా మారింది. ‘కమిటీ కుర్రోళ్లు’ సినిమాతో తెలుగు ప్రేక్షకులకు పరిచయమైన నటుడు సందీప్ సరోజ్ ఇప్పుడు ఈ ‘వేట’ చిత్రంలో హీరోగా నటిస్తున్నాడు. ఈ ప్రాజెక్ట్ పూజా కార్యక్రమాలకు మెగా బ్రదర్ కొణిదెల నాగబాబు స్వయంగా విచ్చేసి ముహూర్తపు సన్నివేశానికి స్క్రిప్ట్ అందజేయడం విశేషం. ఎస్ఆర్‌డి ప్రొడక్షన్స్, ఈటీవీ విన్ సంస్థలు సంయుక్తంగా ఈ ‘వేట’ చిత్రాన్ని ప్రతిష్టాత్మకంగా నిర్మిస్తున్నాయి. ఫణి అడపాక, జయలక్ష్మీ అడపాక నిర్మాతలుగా వ్యవహరిస్తున్న ఈ సినిమాకు నూతన దర్శకుడు అశోక్ కోటిపల్లి దర్శకత్వం వహిస్తున్నారు.

ఆగస్ట్ 31 సోమవారం నాడు ఘనంగా జరిగిన ఈ మూవీ ప్రారంభోత్సవ వేడుకలకు నాగబాబుతో పాటు ప్రముఖ దర్శకుడు కేఎస్ రవి కుమార్, వీఎన్ ఆదిత్య, మెహర్ రమేష్, సాయి రాజేష్, ఎస్‌కేఎన్ ముఖ్య అతిథులుగా విచ్చేశారు. ముహూర్తపు షాట్ కు కేఎస్ రవి కుమార్ క్లాప్ కొట్టగా.. సాయి రాజేష్, ఎస్‌కేఎన్, వీఎన్ ఆదిత్య, ఫణి అడపాక కలిసి కెమెరా స్విచ్ ఆన్ చేశారు. ఈ సందర్భంగా హీరో సందీప్ సరోజ్ మాట్లాడుతూ.. చిరంజీవి గారి ‘వేట’ టైటిల్ తమ కథకు పర్ఫెక్ట్ గా యాప్ట్ అవుతుందని, ఈ టైటిల్ తో వస్తున్న తమ సినిమాను ప్రేక్షకులందరూ ఆదరించాలని కోరాడు. ఈ సినిమాలో ప్రముఖ దర్శకుడు కేఎస్ రవి కుమార్ ఊర్లో ‘పెదరాయుడు’ తరహాలో ఉండే ఒక పవర్ ఫుల్ పాత్రను పోషిస్తున్నారు. దర్శకుడు అశోక్ ఫోన్ లో చెప్పిన కథ అద్భుతంగా అనిపించిందని, జెన్ జీ (Gen Z) ఆడియెన్స్‌కి కూడా ఈ మూవీ బాగా నచ్చుతుందని కేఎస్ రవి కుమార్ ధీమా వ్యక్తం చేశారు. సందీప్ సరోజ్ సరసన సాత్విక జంపా హీరోయిన్‌గా నటిస్తోంది. ‘కమిటీ కుర్రోళ్లు’ లాగానే ఇది కూడా ఓ సహజమైన గ్రామీణ నేపథ్యంతో సాగే కమర్షియల్ చిత్రమని, అశోక్ చెప్పిన కథ ఎంతో నేచురల్ గా ఉంటూనే కమర్షియల్ పంథాలో సాగుతుందని నిర్మాత ఫణి అడపాక పేర్కొన్నారు.