Sampoornesh Babu: ‘కొబ్బరిమట్ట తర్వాత ఆగిన నా ఫోన్.. మళ్లీ ‘ది ప్యారడైజ్’ కే మోగింది!’.. సంపూర్ణేష్ బాబు ఎమోషనల్

Sampoornesh Babu:బర్నింగ్ స్టార్ సంపూర్ణేష్ బాబు చాలా కాలం తర్వాత సరికొత్త మేకోవర్‌తో వెండితెరపై కనిపించి ప్రేక్షకులను ఆకట్టుకుంటున్నారు. నాని హీరోగా, శ్రీకాంత్ ఓదెల దర్శకత్వంలో వచ్చిన భారీ చిత్రం ‘ది పారడైజ్’లో ‘బిర్యానీ’ అనే విలక్షణమైన పాత్రతో సంపూ రీ-ఎంట్రీ ఇచ్చారు. ది ప్యారడైజ్ టీం ప్రత్యేకంగా నిర్వహించిన ‘మీడియా ములాఖత్’లో సంపూర్ణేష్ బాబు మాట్లాడిన మాటలు అందరినీ కదిలించాయి. కెరీర్‌లో ఎదురైన గ్యాప్, అవకాశాలు లేని సమయంలో పడ్డ వేదనను గుర్తుచేసుకుంటూ ఆయన తీవ్ర భావోద్వేగానికి లోనయ్యారు. తన కెరీర్ ఎదుర్కొన్న ఒడిదుడుకులను వివరిస్తూ సంపూ ఓపెన్ అయ్యారు. “‘కొబ్బరిమట్ట’ విడుదలైన తర్వాత నా ఫోన్ రింగ్ అవ్వడం ఆగిపోయింది. ఆ మధ్యలో చాలా సినిమాలు వచ్చాయి, పోయాయి కానీ నా ఫోన్ మాత్రం మోగలేదు. సంపూ ఏదో నాలుగు కామెడీ సినిమాలు చేశాడు, ఇక అతని పని అయిపోయింది అనుకున్న సమయంలో దర్శకుడు శ్రీకాంత్ ఓదెల అన్న నన్ను నమ్మి ఈ పాత్ర ఇచ్చారు. రాజేష్ అన్న అనుకుంటే ‘సంపూర్ణేష్ బాబు’ పుట్టాడు.. ఇప్పుడు శ్రీకాంత్ అన్న అనుకుంటే ‘ది ప్యారడైజ్’లో ‘బిర్యానీ’ పుట్టాడు. నాలో ఉన్న నటుడిని నాకే పరిచయం చేశారు” అంటూ డైరెక్టర్ శ్రీకాంత్ ఓదెలకు ప్రత్యేక కృతజ్ఞతలు చెప్పారు.

హీరో నానితో కలిసి పనిచేసిన అనుభవాన్ని సంపూర్ణేష్ బాబు గుర్తుచేసుకున్నారు. “షూటింగ్ మొదటి రోజే నా చేతిలో బీడీ పెట్టి గెటప్ వేశారు. ఎదురుగా నాని అన్న ఉన్నారు. ఆ క్యారమ్ బోర్డ్ సీన్‌లో డైలాగ్స్ చెప్పేటప్పుడు ఒకటికి పదిసార్లు టేక్స్ తీసుకున్నాను. అసలు ఈ సినిమాలో నన్ను ఉంచుతారా? తీసేస్తారా? అని భయపడ్డాను. మాలిక్ ఎక్కడ అని నాని అన్న చిన్నగా డైలాగ్ చెబితే నేను చిన్నగా, ఆయన గట్టిగా చెబితే నేను గట్టిగా చెప్పేవాడిని. ఆ కన్‌ఫ్యూజన్‌లో ఉన్నప్పుడు నాని అన్న దగ్గరుండి, ‘సంపూ కూల్.. అలా వద్దు, ఇలా చేయి’ అంటూ పక్కనే ఉండి నాతో ఆ సీన్ చేయించారు. నటుడిగా ఎంత ఓపికగా ఉండాలో ఆయనను చూసే నేర్చుకున్నాను” అని అన్నారు. చదువుకునే రోజుల్లో ఎవరి డైలాగులు చెబుతూ పెరిగానో, ఇవాళ వాళ్ల (మోహన్ బాబు గారి) పక్కనే క్యారెక్టర్ చేసే అవకాశం రావడం పూర్వజన్మ సుకృతంగా భావిస్తున్నానని సంపూ అన్నారు. థియేటర్లలో ప్రేక్షకులు ‘ది ప్యారడైజ్’ పాటలకు, సన్నివేశాలకు డాన్సులు చేస్తూ ఎంజాయ్ చేస్తుంటే మాటల్లో చెప్పలేనంత ఆనందం కలిగిందని పేర్కొన్నారు. తనపై నమ్మకం ఉంచి ఇంత మంచి బ్రేక్ ఇచ్చిన చిత్ర బృందానికి, నిర్మాతలకు, తోటి టెక్నీషియన్లకు సంపూర్ణేష్ బాబు హృదయపూర్వక ధన్యవాదాలు తెలిపారు.