Renuka Swamy Case Police Arrests Darshan Thoogudeepa Fan Chethan: రేణుకాస్వామి హత్య కేసులో నటుడు దర్శన్ అరెస్ట్ అయ్యారు. ఇప్పటికే పరప్పణ అగ్రహారం జైలుకు పంపించారు. ఈలోగా రెచ్చగొట్టే ప్రకటనలు చేసిన కొందరు దర్శన్ అభిమానులపై ఉక్కుపాదం మోపేందుకు పోలీసులు కసరత్తులు చేస్తున్నారు. ఈ క్రమంలోనే ‘రాబర్ట్’ సినిమా నిర్మాత ఉమాపతి శ్రీనివాస్ గౌడ్ గురించి కించపరిచేలా వ్యాఖ్యలు చేసినందుకు దర్శన్ అభిమాని చేతన్ అరెస్ట్ అయ్యాడు. రేణుకాస్వామి హత్య కేసులో అరెస్ట్ అయిన నటుడు దర్శన్ను అన్నపూర్ణేశ్వరి నగర్ పోలీస్ స్టేషన్లో ఉంచారు. దీంతో దర్శన్ అభిమానులు రోజూ అక్కడ గుమిగూడేవారు. ఈ సమయంలో అక్కడికి వచ్చిన చేతన్ ఉమాపతి శ్రీనివాస్ గౌడ్ ను కించపరిచేలా ప్రకటన చేశాడు. నిర్మాత ఉమాపతి శ్రీనివాస్ గౌడ్ కొన్ని ఛానల్స్ కు ఇంటర్వ్యూ ఇచ్చారు. దాంతో కోపోద్రిక్తుడైన చేతన్ బహిరంగంగా కించపరిచేలా వ్యాఖ్యలు చేశాడు. దీనిపై ఉమాపతి శ్రీనివాస్ గౌడ్ బసవేశ్వర్ నగర్ పోలీస్ స్టేషన్లో ఫిర్యాదు చేశారు.
ఆ నేపథ్యంలో ఇప్పుడు చేతన్ని అరెస్ట్ చేశారు. చేతన్ అరెస్ట్ తర్వాత అతడికి సంబంధించిన ఓ వీడియో వైరల్గా మారింది. “నా పేరు చేతన్. నేను దర్శన్ అభిమానిని. ఆ రోజు అన్నపూర్ణేశ్వరి నగర్ పోలీస్ స్టేషన్కి వెళ్లాను. అక్కడ ఉమాపతి శ్రీనివాస్ గౌడ్ గురించి తప్పుగా మాట్లాడాను. ఇప్పుడు చట్టానికి శిరస్సు వంచి నమస్కరిస్తున్నాను” అని చేతన్ ఆ వీడియోలో పేర్కొన్నాడు. నిందితుడు చేతన్పై బసవేశ్వర్ నగర్ పోలీస్ స్టేషన్లో ఐపిసి సెక్షన్ 504, 506 కింద ఎఫ్ఐఆర్ నమోదైంది. అలాగే, నటుడు దర్శన్ను 14 రోజుల జ్యుడీషియల్ కస్టడీకి పంపారు. దర్శన్ను ఆయన భార్య విజయలక్ష్మి సోమవారం (జూన్ 24) కలిశారు. అంతేకాకుండా కొడుకు వినీష్ను తీసుకెళ్లిన విజయలక్ష్మి.. దర్శన్తో 15 నిమిషాల పాటు మాట్లాడింది. 14 రోజుల తర్వాత దర్శన్ తన కుమారుడిని చూసి భావోద్వేగానికి గురై కన్నీరుమున్నీరుగా విలపించినట్లు సమాచారం. నటుడు దర్శన్, పవిత్రగౌడ్ సహా మొత్తం 17 మంది నిందితులు పరప్పణ అగ్రహార సెంట్రల్ జైలులో ఉన్నారు.