Rambha Urvashi Menaka Teaser: అల్లరి నరేష్‌ కామెడీకి దేవకన్యలు తోడైతే.. టీజర్‌లో అసలు కథ ఇదే!

Rambha Urvashi Menaka Teaser: కొంతకాలంగా విభిన్నమైన, సీరియస్ కథలను ఎంచుకుంటున్న అల్లరి నరేష్ మరోసారి తనకు బాగా కలిసొచ్చిన కామెడీ జానర్‌లోకి అడుగుపెట్టారు. ఆయన హీరోగా తెరకెక్కిన ‘రంభ ఊర్వశి మేనక’ సెప్టెంబర్ 4న ప్రేక్షకుల ముందుకు రాబోతోంది. ఇప్పటికే ఫస్ట్ లుక్ తో ఆసక్తి పెంచిన చిత్రబృందం తాజాగా టీజర్‌ను విడుదల చేసి సినిమా కథపై ఆసక్తికరమైన క్లూ ఇచ్చింది. అసలు భూమిపైకి దేవకన్యలు ఎందుకు వస్తారు? వారి రాకతో నరేష్ జీవితంలో ఎలాంటి గందరగోళం మొదలవుతుంది? అనే అంశాలతో ఈ టీజర్ ఆసక్తికరంగా సాగుతుంది.

టీజర్‌లో ఓ మాయా పుస్తకం చుట్టూ కథ తిరుగుతున్నట్లు తెలుస్తోంది. దాని ద్వారా ఇంద్రలోకానికి ద్వారాలు తెరుచుకుంటాయని, అలా రంభ, ఊర్వశి, మేనకలను భూమిపైకి తీసుకురావచ్చని ఈ టీజర్ హింట్ ఇచ్చింది. ఈ విషయాన్ని నమ్మిన నరేష్ ఏకంగా పాతిక ఏళ్ల పాటు దేవకన్యల కోసం ఎదురుచూస్తూ తన ప్రయత్నాలు కొనసాగిస్తుంటాడు. చివరకు రంభ, ఊర్వశి, మేనకలు భూమిపైకి దిగడంతో అసలు కామెడీ మొదలవుతుందని టీజర్ సూచిస్తోంది. ఒక గ్రామీణ వాతావరణంలోకి  దేవకన్యలు ప్రవేశిస్తే ఎలాంటి పరిస్థితులు ఎదురవుతాయనే అంశం చుట్టూ దర్శకుడు చంద్ర మోహన్ చింతాడ కథను అల్లినట్లు కనిపిస్తోంది.  చాలా కాలం తర్వాత నరేష్ పూర్తిస్థాయి కామెడీ పాత్రలో వస్తుండటంతో  ఆడియన్స్ కి నవ్వుల పండుగ వస్తున్నట్లే కనిపిస్తోంది. మరోవైపు వెన్నెల కిషోర్ ఇంద్రుడి పాత్రలో కనిపిస్తూ తనదైన కామెడీతో నవ్వులు పంచే ప్రయత్నం చేశారు.

ఇందులో సురభి కథానాయికగా నటిస్తుండగా, రాశి సింగ్ రంభగా, విష్ణుప్రియ ఊర్వశిగా, ప్రిషా సింగ్ మేనకగా కనిపించనున్నారు. దేవకన్యల పాత్రలు కథలో ఎలాంటి మలుపులు తీసుకువస్తాయనేది ఆసక్తికరంగా మారింది. అన్నపూర్ణ స్టూడియోస్, హాస్య మూవీస్ బ్యానర్లపై రజేష్ దండ, నిమ్మకాయల ప్రసాద్ ఈ మూవీని నిర్మించారు. అల్లరి నరేష్ గతంలో తన కామెడీ సినిమాలతో ప్రత్యేకమైన ప్రేక్షక వర్గాన్ని సంపాదించుకున్నారు. మధ్యలో ప్రయోగాలు చేసిన ఆయన ఇప్పుడు మరోసారి తనకు బాగా కనెక్ట్ అయ్యే కామెడీ జానర్‌లోకి రావడం సినిమాపై అంచనాలను పెంచుతోంది.

మొత్తంగా చూస్తే, రంభ, ఊర్వశి, మేనకలను భూమిపైకి తీసుకురావాలనే నరేష్ ప్రయత్నం చివరకు ఎలాంటి గందరగోళానికి దారితీస్తుందనేదే ఈ సినిమా ప్రధాన ఆసక్తిగా మారింది. మాయా పుస్తకం, ఇంద్రుడి అడ్డంకులు, దేవకన్యల రాక, నరేష్ కామెడీ కలిసి పూర్తి స్థాయి ఫాంటసీ ఎంటర్‌టైనర్‌ను అందిస్తాయనే సంకేతాలు టీజర్ ఇచ్చింది. సెప్టెంబర్ 4న థియేటర్లలోకి రానున్న ఈ సినిమా అల్లరి నరేష్‌ను మళ్లీ తన కామెడీ జోన్‌లో ఎలా చూపిస్తుందో చూడాలి.