Kalavedika: ఎన్టీఆర్‌ శతజయంతి ఉత్సవాల్లో పలువురికి పురస్కారాలు!

NTR: నందమూరి తారక రామారావు శత జయంతి ఉత్సవాలు ఈ ఏడాది మొత్తం రెండు తెలుగు రాష్ట్రాల్లోనూ వైభవంగా జరుగుతున్నాయి. అందులో భాగంగా హైదరాబాద్‌ ప్రసాద్‌ ల్యాబ్‌లో ఇటీవల జరిగిన వేడుకలో కళావేదిక స్పెషల్‌ మ్యాగజైన్‌ను విడుదల చేశారు. నిర్మాత చదలవాడ శ్రీనివాసరావు దీన్ని ఆవిష్కరించి, తొలి ప్రతిని ప్రముఖ నిర్మాత ఎన్.ఆర్. అనురాధా దేవికి అందించారు. అనంతరం ఎన్టీఆర్‌ లైఫ్‌ టైమ్ అవార్డును ఆమెకు అందజేశారు. స్వర్గీయ ఆర్‌. వి. రమణమూర్తి లైఫ్‌ టైం ఎఛీవ్‌మెంట్‌ను పొత్తూరి రంగారావుకి, ఎన్టీఆర్‌ కళావేదిక ఫిల్మ్‌ అవార్డులను రోజా రమణి, రాజ్‌ కందుకూరి, పృథ్వీ, సంగీత దర్శకుడు కె. ఎం. రాధాకృష్ణన్‌, శివ కందుకూరి, కృష్ణసాయి, గాయకుడు సాకేత్‌ వేగి, వి.వి. రష్మిక, నిర్మాత విజయ బాబు, త్రినాథ్‌ పంపన తదితరులకు అందజేశారు. ఈ సందర్భంగా కార్యక్రమంలో పాల్గొన్న ముఖ్య అతిథులను సన్మానించారు.

ఈ సందర్భంగా ఆర్.వి. రమణమూర్తి కుమార్తె అనురాధాదేవి మాట్లాడుతూ, “ఎన్టీఆర్‌ను దేవునిలా భావించే కోట్లాదిమందిలో నేను ఒక్కదాన్ని. ఆయన, మా నాన్న రమణమూర్తి గారు మంచి స్నేహితులు. వాళ్లిద్దరూ కళాసేవలోనే జీవితమంతా ఉండిపోయారు. అలాంటి మహానుభావుడి శతజయంతి సందర్భంగా కళావేదిక స్పెషల్‌ మ్యాగజైన్‌ ఆవిష్కరించడం ఆనందంగా ఉంది’’ అని అన్నారు. ఈ కార్యక్రమంలో తెలుగు చలనచిత్ర నిర్మాతల మండలి అధ్యక్షుడు కె.ఎల్. దామోదర్‌ ప్రసాద్‌, కార్యదర్శి ప్రసన్నకుమార్‌, వైవిఎస్‌ చౌదరి, అనుపమా రెడ్డి, రామసత్యనారాయణ, , వివి రష్మిక, దర్శకుడు బాబ్జి, ఉప్పల శ్రీనివాస్‌ గుప్తా, జి శ్రీనివాస్‌ తదితరులు పాల్గొన్నారు.