Nayanathra : వయసుతో పనేముంది? కుర్ర హీరోతో లేడీ సూపర్ స్టార్ రొమాన్స్.. ఓటీటీలోకి వచ్చేసిన ‘హాయ్’!

లేడీ సూపర్ స్టార్ నయనతార, యువ హీరో కవిన్ కాంబినేషన్ లో తెరకెక్కిన విభిన్నమైన రొమాంటిక్ డ్రామా ‘హాయ్’ (Hi). నేటితరం ప్రేమ, ఆధునిక సంబంధాల్లోని సంక్లిష్టతలను అత్యంత ఆసక్తికరంగా ఆవిష్కరించిన ఈ చిత్రం, ఇప్పుడు డిజిటల్ ప్లాట్ ఫామ్ పై సందడి చేసేందుకు సిద్ధమైంది. ప్రముఖ ఓటీటీ సంస్థ జీ5 (ZEE5) ఈ చిత్రాన్ని నేటి నుంచి తమిళ భాషలో ఎక్స్ క్లూజివ్ గా స్ట్రీమింగ్ చేయనుంది. సాధారణంగా నయనతార పాత్రలంటే ఎంతో బలంగా ఉంటాయి. ఈ సినిమాలో కూడా ఆమె అత్యంత ఆత్మవిశ్వాసం, స్వతంత్ర భావాలున్న యువతిగా నటించారు. అయితే బయటికి ఎంత స్ట్రాంగ్ గా కనిపించినా, లోపల మాత్రం ఎన్నో భయాలు, అంతర్గత సంఘర్షణలను మోస్తుండే నేటితరం అమ్మాయిల మనస్తత్వాన్ని ఆమె ఈ సినిమాలో అద్భుతంగా పండించారు. కుటుంబ సమస్యలతో సతమతమవుతూ, తనకు ఇష్టం లేని పెళ్లి నుంచి తప్పించుకోవాలని ప్రయత్నించే ఓ యువతి.. అనుకోకుండా ఒక కుర్రాడిని కలిసినప్పుడు వారి జీవితం ఎలాంటి మలుపులు తిరిగిందనేదే ‘హాయ్’ కథాంశం. ఈ క్రమంలో బంధాలను ఎలా స్వీకరించాలి, ప్రేమను ఎలా అర్థం చేసుకోవాలి అనే ఎన్నో అంశాలను ఈ సినిమా టచ్ చేసింది.

ఈ సినిమా ఓటీటీ రిలీజ్ సందర్భంగా నయనతార ఆసక్తికర విషయాలు పంచుకున్నారు. “నేటి ప్రపంచంలో ప్రేమ ఎలా మారుతోంది, రిలేషన్ షిప్స్ లో ఎలాంటి సవాళ్లు వస్తున్నాయి అనేదాన్ని ఈ సినిమాలో చాలా న్యాచురల్ గా చూపించారు. ఒకరికొకరు పూర్తి భిన్నంగా ఉన్న ఇద్దరు వ్యక్తులు.. తమలోని అభద్రతా భావాలను దాటుకుని తోడు కోసం ఎలా ఒక్కటయ్యారనేది ఇందులో చూడొచ్చు. బంధాలను నిలబెట్టుకోవడంలో జరిగే లోపలి సంఘర్షణ, కుటుంబం నుంచి వచ్చే ఒత్తిడి.. ఇవన్నీ కూడా ఎంతో సహజంగా కనిపిస్తాయి. అందుకే ఈ కథ అందరికీ కనెక్ట్ అవుతుంది” అని నయన్ తెలిపారు. ఇక ఈ సినిమాలో యంగ్ హీరో కవిన్ పాత్ర కూడా ఎంతో సెన్సేషనల్ గా ఉండబోతోంది. సాధారణంగా సమాజంలో మగాళ్లు ఏడవకూడదు, తమ ఎమోషన్స్ ను బయటపెట్టకూడదు అంటుంటారు. కానీ ఇందులో హీరో తన మనసులోని బాధను, ఆత్మన్యూనతా భావాన్ని దాచుకోకుండా ఫ్రీగా ఎక్స్ ప్రెస్ చేస్తాడు. ఎన్నో తిరస్కరణలు ఎదురైనా, తన జీవితంలో నిజమైన ప్రేమను పొందాలనే ఆశను మాత్రం వదులుకోని యువకుడిగా కవిన్ అద్భుతంగా నటించారు. విష్ణు ఎడవన్ దర్శకత్వం వహించిన ఈ చిత్రంలో రాధికా శరత్ కుమార్, ప్రభు లాంటి సీనియర్ నటులు కీలక పాత్రలు పోషించారు. అన్నిటికంటే ముఖ్యంగా, ఇటీవలే కన్నుమూసిన దిగ్గజ దర్శకుడు, నటుడు, రచయిత కె. భాగ్యరాజ్ తెరపై కనిపించిన చివరి చిత్రాల్లో ‘హాయ్’ కూడా ఒకటి కావడం గమనార్హం. ఆయన నటన ఈ సినిమాకు ఒక ప్రత్యేకమైన గుర్తింపును, ఎమోషన్ ను తీసుకురానుంది.