నందమూరి నటవంశంలో హీరోలుగా ప్రయత్నించిన వారు కొందరే! అయితే వారిలో నటరత్న యన్టీఆర్ వారసులుగా తనయుడు బాలకృష్ణ, మనవడు జూనియర్ యన్టీఆర్ స్థాయిలో రాణించినవారు లేరు. అయితే నటరత్న మరో మనవడు నందమూరి తారకరత్న చిత్రసీమలో హీరోగా అడుగుపెట్టడంతోనే ఓ రికార్డును తన సొంతం చేసుకున్నారు.
ఒక్క సినిమా కూడా విడుదల కాకుండానే ఒకే రోజు తొమ్మిది చిత్రాల ప్రారంభోత్సవం చూశారు. ఆ తొమ్మిది చిత్రాలలో తరువాత వెలుగు చూసినవి కొన్నే! అందులో విజయాలు చూసినవి లేవనే చెప్పాలి. అయినా అప్పటి నుంచీ తారకరత్న పట్టువదలని విక్రమార్కునిలా ప్రయత్నాలు సాగిస్తూనే ఉన్నారు. హీరో పాత్రలే వేస్తానని భీష్మించుకోలేదు. తన దరికి చేరిన ఏ పాత్రలోనైనా నటించడానికి సిద్ధం అంటూ సాగారు. ‘అమరావతి’ చిత్రంలో విలన్ గా నటించి, బెస్ట్ విలన్ గా నంది అవార్డుకు ఎన్నికయ్యారు తారకరత్న.