OTT Updates: ఓటీటీలోకి వచ్చేస్తోన్న మెగాస్టార్ ‘గాడ్ ఫాదర్’.. డేట్ ఫిక్స్

OTT Updates:  దసరా కానుకగా అక్టోబర్ 5న విడుదలైన మెగాస్టార్ చిరంజీవి గాడ్ ఫాదర్ మూవీ పాజిటివ్ టాక్ సంపాదించుకుంది. మలయాళ సూపర్ హిట్ లూసీఫర్‌కు రీమేక్‌గా ఈ మూవీ తెరకెక్కింది. కోలీవుడ్ డైరెక్టర్ మోహన్ రాజా ఈ సినిమాకు దర్శకత్వం వహించాడు. మెగాస్టార్ గత చిత్రం ఆచార్య ఫ్లాప్‌తో నీరసించిపోయిన మెగా అభిమానులకు ఈ సినిమా ఫలితం కొద్దిగా ఊరటను కలగజేసింది. ఈ మూవీలో చిరు సరికొత్త లుక్‌లో కనిపించడంతో ఆయన్ను చూసేందుకు అభిమానులు ఆసక్తిని చూపారు. తెలుగు నేటివిటీకి తగ్గట్లుగా కథలో కొన్ని మార్పులు చేయడంతో ఈ సినిమా తెలుగు ప్రేక్షకులకు బాగానే కనెక్ట్ అయ్యింది. ఇప్పుడు ఈ సినిమా ఓటీటీ రిలీజ్‌కు రెడీ అవుతోంది. ఈ సినిమా డిజిటల్ హక్కులను ప్రముఖ ఓటీటీ నెట్‌ఫ్లిక్స్ కొనుగోలు చేసింది.

Read Also: Naveen Chandra: తగ్గేదే లే.. ఆమె కోసమే 38సార్లు సినిమా చూశా.. ఇంతలా ఆ హీరోకు నచ్చిన నటి ఎవరంటే ?

తాజాగా నెట్‌ఫ్లిక్స్ గాడ్ ఫాదర్ మూవీ స్ట్రీమింగ్ డేట్‌ను ప్రకటించింది. ఈ సినిమాను నవంబర్ 19న స్ట్రీమింగ్ చేయబోతున్నట్లు వెల్లడించింది. దీంతో మెగా అభిమానులు ఈ సినిమాను ఓటీటీలో చూసేందుకు ఎదురుచూస్తున్నారు. ఈ సినిమాకు ఓటీటీలో ఎలాంటి రెస్పాన్స్ దక్కుతుందో తెలియాలంటే నవంబర్ 19 వరకు వెయిట్ చేయాల్సి ఉంటుంది. బాలీవుడ్ కండలవీరుడు సల్మాన్ ఖాన్ తొలిసారిగా తెలుగులో నటించిన చిత్రమిది. చిరంజీవితో పాటు నయనతార, సత్యదేవ్ నటించిన ఈ మూవీని కొణిదెల ప్రొడక్షన్ కంపెనీ, సూపర్ గుడ్ ఫిలింస్ సంస్థలు సంయుక్తంగా నిర్మించాయి. తమన్ సంగీతం ఈ మూవీకి ప్లస్ పాయింట్‌గా నిలిచింది.