Guru Swamy: బ్రేకింగ్.. ‘మహర్షి’ రైతు కన్నుమూత

Guru Swamy: సూపర్ స్టార్ మహేష్ బాబు- వంశీ పైడిపల్లి కాంబోలో తెరకెక్కిన చిత్రం మహర్షి. 2019 లో రిలీజ్ అయిన ఈ సినిమా భారీ విజయాన్ని అందుకొని మహేష్ కెరీర్ లో టాప్ 10 సినిమాల్లో ఒకటిగా నిలిచింది. ఇక ఈ చిత్రంలో బిజినెస్ మ్యాన్ గా అమెరికా నుంచి వచ్చి ఒక పల్లెటూరిలో మహేష్ బాబు వ్యవసాయం చేస్తూ ఉంటాడు. తన స్నేహితుడు కోసం అండగా నిలబడడానికి వచ్చిన మహేష్ కు ఒక ముసలి తాత జ్ఞానోపదేశం చేస్తాడు. వ్యవసాయం అంటే ఏంటో..? రైతు అంటే ఎవరో చెప్పి మహేష్ కళ్ళు తెరిపిస్తాడు. మహర్షి సినిమా చూసిన ప్రతిఒక్కరికి ముసలి రైతు పాత్ర కంటతడి పెట్టిస్తోంది. పదరా పదరా సాంగ్ లో మహేష్ కు వ్యవసాయం ఎలా చేయాలో నేర్పించి అందరి చేత ప్రశంసలు అందుకున్న ఆ నటుడు ఇప్పుడు లేరు. నేటి ఉదయం నటుడు గురు స్వామి మృతి చెందినట్లు కుటుంబ సభ్యులు తెలిపారు.

వయో వృద్ధాప్యంతో పోరాడుతున్న ఆయన పరిస్థితి విషమించడంతో శుక్రవారం మృతిచెందారు. గురుస్వామి సొంత ఊరు కర్నూల్. చిన్నతనం నుంచి ఎన్నో నాటకాల్లో నటించడమే కాకుండా తనలాంటి కళాకారులు బతకాలని విజేత ఆర్ట్స్ అనే ఒక సంస్థను ఏర్పాటు చేసి నాటకాలు వేసేవారు గురుస్వామి. ఆలా నాటక రంగంలో ఆరితేరిన ఆయనకు కొన్ని సినిమాల్లో చిన్న చిన్న పాత్రలు చేసే అవకాశం లభించింది. ఇక మహర్షి సినిమాలో రైతు పాత్రకు విశేష ఆదరణ లభించింది. మహర్షి ప్రీ రిలీజ్ ఈవెంట్ లోనూ. సక్సెస్ మీట్ లోను ఆయన తన గాధను వివరించారు. ఇక గురుస్వామి మరణ వార్త విన్న పలువురు సినీ ప్రముఖులు సోషల్ మీడియా వేదికగా సంతాపం తెలుపుతున్నారు.