Kiran Abbavaram: ‘మా తమిళోల్లు మీ సినిమాలు చూడరు..’ ఉన్న విషయం చెప్పిన హీరో కిరణ్ అబ్బవరం

Kiran Abbavaram: యువ హీరో కిరణ్ అబ్బవరం నటిస్తున్న ‘చెన్నై లవ్ స్టోరీ’ ఈనెల 24న ప్రేక్షకుల ముందుకు రానుంది. ఈ సందర్భంగా సినిమా ప్రమోషన్స్‌లో భాగంగా ఇచ్చిన ఓ ఇంటర్వ్యూలో ఆయన తెలుగు, తమిళ సినీ పరిశ్రమల మధ్య ఉన్న మార్కెట్ పరిస్థితులపై ఆసక్తికర వ్యాఖ్యలు చేశారు. ముఖ్యంగా తమిళనాడులో తెలుగు సినిమాలకు థియేటర్లు దక్కడం కష్టంగా మారిందని ఆయన అభిప్రాయపడ్డారు. ఈ సందర్భంగా కిరణ్ అబ్బవరం మాట్లాడుతూ.. తమిళ హీరోల సినిమాలకు తెలుగు ప్రేక్షకులు ఎప్పుడూ మంచి ఆదరణ ఇస్తుంటారని, అయితే అదే స్థాయిలో తెలుగు హీరోలకు తమిళనాడులో మద్దతు లభించడం లేదని ఆవేదన వ్యక్తం చేశారు. “కోలీవుడ్ హీరోలకు మనం ఇంత సపోర్ట్ ఇస్తున్నప్పుడు.. మన తెలుగు హీరోల సినిమాలకు కూడా అక్కడి ప్రేక్షకులు, డిస్ట్రిబ్యూటర్లు అదే విధంగా ప్రోత్సాహం ఇవ్వాలి కదా” అని ఆయన వ్యాఖ్యానించారు.

ఇటీవల హీరో సూర్య నటించిన ‘కరుప్పు’ చిత్రాన్ని తెలుగులో ‘వీరభద్రుడు’ పేరుతో విడుదల చేస్తే ఇక్కడి ప్రేక్షకులు బాగా ఆదరించారని గుర్తు చేశారు. అయితే తెలుగులో విజయవంతమైన సినిమాలను తమిళంలో విడుదల చేయాలంటే పరిస్థితి పూర్తిగా భిన్నంగా ఉంటోందని అన్నారు. ఇటీవల సూపర్ హిట్ సాధించిన ‘లెనిన్’ చిత్రాన్ని తమిళంలో విడుదల చేయాలని అనుకుంటే కనీసం అక్కడ సరిపడా థియేటర్లు కూడా దొరకని పరిస్థితి నెలకొందని అన్నారు. ఇది ఒక్క సినిమా సమస్య కాదని, దాదాపు అందరి తెలుగు హీరోల చిత్రాలకూ ఇదే పరిస్థితి ఎదురవుతోందని పేర్కొన్నారు. ఇదే విషయాన్ని తన తాజా చిత్రం ‘చెన్నై లవ్ స్టోరీ’ విడుదల సందర్భంగా కూడా అనుభవించానని కిరణ్ అబ్బవరం వెల్లడించారు. తమిళనాడులో తన సినిమాను రిలీజ్ చేయడం కోసం అక్కడి డిస్ట్రిబ్యూటర్లతో మాట్లాడినప్పుడు.. “మా తమిళ ప్రేక్షకులు తెలుగు హీరోల సినిమాలు పెద్దగా చూడరు” అని వారు నేరుగా చెప్పారని అన్నారు. ఈ పరిస్థితి మారి రెండు పరిశ్రమల మధ్య పరస్పర సహకారం పెరగాలని ఆయన ఆకాంక్షించారు.