Vallabhaneni Anil: టాలీవుడ్‌లో యూనియన్ వివాదానికి ఫుల్‌స్టాప్.. జానీ మాస్టర్‌పై నాన్‌ కోఆపరేషన్ ఎత్తివేత!

Vallabhaneni Anil: టాలీవుడ్‌లో గత కొన్ని రోజులుగా చర్చనీయాంశమైన తెలుగు ఫిలిం ఇండస్ట్రీ ఎంప్లాయీస్ ఫెడరేషన్, డాన్సర్స్ యూనియన్, ప్రముఖ కొరియోగ్రాఫర్ జానీ మాస్టర్‌కు సంబంధించిన వివాదానికి ఎట్టకేలకు తెరపడింది. సినీ పరిశ్రమ పెద్దల సమక్షంలో జరిగిన కీలక సమావేశంలో అన్ని విభేదాలను చర్చల ద్వారా పరిష్కరించి, పరిశ్రమలో సామరస్య వాతావరణం కొనసాగించేలా నిర్ణయాలు తీసుకున్నారు. ఫెడరేషన్ ప్రతినిధులు, నిర్మాతల మండలి సెక్రటరీ ప్రసన్నకుమార్, చదలవాడ శ్రీనివాసరావు, అజయ్, ఫెడరేషన్ వైస్ ప్రెసిడెంట్ సాయిరాజేష్, డాన్సర్స్ యూనియన్ అధ్యక్షురాలు సుమలత దేవి, జానీ మాస్టర్ తదితరులు సమావేశంలో పాల్గొన్నారు. ఈ సందర్భంగా తెలుగు ఫిలిం ఇండస్ట్రీ ఎంప్లాయీస్ ఫెడరేషన్ అధ్యక్షుడు అనిల్ వల్లభనేని మాట్లాడుతూ.. జానీ మాస్టర్ తనపై వచ్చిన అంశాలపై పూర్తి వివరణ ఇవ్వగా, ఫెడరేషన్ ఆ వివరణతో సంతృప్తి వ్యక్తం చేసిందన్నారు. దీంతో ఆయనపై విధించిన నాన్‌ కోఆపరేషన్ నిర్ణయాన్ని వెంటనే ఉపసంహరించుకుంటున్నట్లు ప్రకటించారు. ఇకపై జానీ మాస్టర్ యథావిధిగా తన వృత్తిపరమైన బాధ్యతలను నిర్వహించవచ్చని స్పష్టం చేశారు.

డాన్సర్స్ యూనియన్‌లో నెలకొన్న అంతర్గత విభేదాలపై కూడా సమావేశంలో చర్చించామన్నారు. యూనియన్ కార్యవర్గంపై వచ్చిన ఆరోపణలు, సస్పెన్షన్ అంశాలను సర్వసభ్య సమావేశంలో చర్చించి ప్రజాస్వామ్య పద్ధతిలో నిర్ణయం తీసుకోవాలని ఫెడరేషన్ సూచించినట్లు వెల్లడించారు. సుమలత దేవి ఆధ్వర్యంలో ప్రస్తుత కార్యవర్గం కొనసాగుతుందని, ఆరోపణలు ఎదుర్కొంటున్న వ్యక్తులపై సభ్యుల అభిప్రాయం మేరకు చర్యలు తీసుకుంటామని వెల్లడించారు. ఈ వివాదం పరిష్కారంలో సినీ పరిశ్రమ ప్రముఖులు మెగాస్టార్ చిరంజీవి, నందమూరి బాలకృష్ణ కీలక పాత్ర పోషించినట్లు సమావేశంలో వెల్లడించారు. సమస్య తీవ్రరూపం దాల్చకుండా వెంటనే పరిష్కరించాలని ఇద్దరూ ప్రత్యేకంగా సూచించినట్లు తెలిపారు. అనంతరం జానీ వైఫ్, డాన్సర్స్ యూనియన్ ప్రెసిడెంట్ సుమలత మాట్లాడుతూ.. మేము పోరాడిదే శ్రమ దోపిడి జరగకూడదనే, ఆ సమస్యను ఫెడరేషన్ దృష్టికి తీసుకుని వెళ్ళడం జరిగిందన్నారు. అనంతరం చదలవాడ శ్రీనివాస్ మాట్లాడుతూ.. వల్లభనేని అనిల్ గారు, సుమలత గారు ఇలా ఇద్దరు పోరాడిదే, గొడవడిదే కార్మికుల సంక్షేమం కోసమే సుమలత గారు శ్రమ దోపిడి లేకుండా చూడాలని అనిల్ గారిని కోరారని, ఆయన కూడా ఆ సమస్య మీద దృష్టి సారించారని చెప్పారు. మొత్తానికి ఈ సమస్య ఇంతటితో సమసిపోయిందని చెప్పారు.