Dhoom 4: బాలీవుడ్లో ‘రామాయణం’, ‘అనిమల్ పార్క్’, ‘లవ్ అండ్ వార్’, ‘బ్రహ్మాస్త్ర 2’, ‘ధూమ్ 4’ వంటి భారీ ప్రాజెక్ట్స్ తో దూసుకెళ్తున్నారు రణబీర్ కపూర్. అయితే వీటిలో అత్యంత ఆసక్తిగా ఎదురుచూస్తున్న సినిమాలలో ‘ధూమ్ 4’ కూడా ఒకటి. యశ్ రాజ్ ఫిల్మ్స్ ప్రతిష్ఠాత్మకంగా రూపొందించాలనుకుంటున్న ఈ ప్రాజెక్ట్పై ఇప్పటికే భారీ అంచనాలు ఏర్పడ్డాయి. ఇప్పుడు ఈ ప్రాజెక్ట్కు సంబంధించి మరో కీలక ప్రచారం బాలీవుడ్లో హాట్ టాపిక్గా మారింది. తాజా సమాచారం ప్రకారం, సినిమా స్క్రిప్ట్పై అసంతృప్తితో రణబీర్ కపూర్ ఈ ప్రాజెక్ట్ నుంచి తప్పుకోవాలని నిర్ణయించుకున్నట్లు వార్తలు వినిపిస్తున్నాయి. మొదట ఈ సినిమాకి దర్శకుడు అయాన్ ముఖర్జీ దర్శకత్వం వహిస్తారని ప్రచారం జరిగింది. కానీ కథ, స్క్రీన్ప్లేలో జరిగిన మార్పుల తర్వాత పరిస్థితులు మారినట్లు సమాచారం.
బాలీవుడ్ వర్గాల్లో వినిపిస్తున్న కథనాల ప్రకారం, ‘వార్ 2’ ఆశించిన స్థాయిలో రెస్పాన్స్ రాకపోవడంతో యశ్ రాజ్ ఫిల్మ్స్ ‘ధూమ్ 4’ స్క్రిప్ట్ను మళ్లీ పరిశీలించినట్లు తెలుస్తోంది. ప్రేక్షకుల అభిరుచికి అనుగుణంగా కథలో మార్పులు చేసి కొత్త వెర్షన్ సిద్ధం చేసినప్పటికీ, ఆ స్క్రిప్ట్ రణబీర్ కపూర్ను పూర్తిగా మెప్పించలేదని ప్రచారం జరుగుతోంది. దీంతో ఆయన ఈ ప్రాజెక్ట్కు దూరంగా ఉండాలని నిర్ణయించుకున్నట్లు టాక్ వినిపిస్తోంది. ఈ నిర్ణయం యశ్ రాజ్ ఫిల్మ్స్కు ప్రతికూలంగా మారినట్టే తెలుస్తోంది. ఎందుకంటే రణబీర్ కపూర్ రాక ఈ ఫ్రాంచైజీలో భారీ హైప్ను తీసుకొచ్చింది. రణబీర్ నిజంగానే తప్పుకుంటే, ఇప్పుడు ఆ పాత్ర కోసం మరో స్టార్ హీరోను ఎంపిక చేయాల్సిన పరిస్థితి ఏర్పడే అవకాశం ఉంది. అందుకే నిర్మాణ సంస్థ ఇప్పటికే ప్రత్యామ్నాయ నటుల పేర్లను పరిశీలిస్తున్నట్లు ప్రచారం సాగుతోంది.
అయితే ఆ జాబితాలో ఎవరి పేర్లు ఉన్నాయనే విషయంపై మాత్రం ఇప్పటివరకు ఎలాంటి స్పష్టత లేదు. ప్రస్తుతం వస్తున్న ఈ సమాచారం అంతా పరిశ్రమలో జరుగుతున్న ప్రచారమే. రణబీర్ కపూర్ గానీ, యశ్ రాజ్ ఫిల్మ్స్ గానీ ఈ విషయంపై ఇప్పటివరకు ఎలాంటి అధికారిక ప్రకటన చేయలేదు. అలాగే ఆయన నిజంగా ప్రాజెక్ట్ నుంచి తప్పుకున్నారా లేదా అన్న విషయంపై కూడా ఎలాంటి స్పష్టత వెలువడలేదు. దీంతో ‘ధూమ్ 4’ భవిష్యత్తుపై అభిమానుల్లో ఆసక్తి మరింత పెరిగింది. రణబీర్ కపూర్ ఈ చిత్రంలో కొనసాగుతారా? లేక కొత్త స్టార్ హీరో ఈ ప్రతిష్ఠాత్మక ఫ్రాంచైజీలో చేరతారా? స్క్రిప్ట్ మార్పుల తర్వాత సినిమా ఏ రూపంలో ప్రేక్షకుల ముందుకు వస్తుంది? అనే ప్రశ్నలకు సమాధానాలు అధికారిక ప్రకటన వచ్చిన తర్వాతే స్పష్టత రానుంది.