“హిట్” హిందీ రీమేక్ ప్రారంభం

విశ్వక్ సేన్ హీరోగా నటించిన సస్పెన్స్ థ్రిల్లర్ “హిట్” మూవీ. గత ఏడాది ఫిబ్రవరి 20న విడుదలైన ఈ చిత్రం టాలీవుడ్ ప్రేక్షకులను విశేషంగా ఆకట్టుకుంది. శైలేష్ కొలను దర్శకత్వం వహించారు. ఈ సినిమా కథ నచ్చడంతో హిందీ మేకర్స్ దృష్టి “హిట్”పై పడింది. ఇంకేముంది తెలుగు కాప్ థ్రిల్లర్ “హిట్” మూవీ హిందీలో రీమేక్ కానుంది. ఈ హిందీ రీమేక్ లో రాజ్ కుమార్ రావు హీరోగా కనిపించనున్నాడు.

హిందీ రీమేక్ కు కూడా తెలుగు ఒరిజినల్‌కు దర్శకత్వం వహించిన డైరెక్టర్ శైలేష్ కొలను దర్శకత్వం వహించనున్నారు. ప్రీ ప్రొడక్షన్ దశలో ఉన్న ఈ చిత్రానికి హీరోయిన్ ను ఖరారు చేశారు. రాజ్ కుమార్ రావు సరసన సన్యా మల్హోత్రా హీరోయిన్ గా నటించబోతోంది. హిందీ రీమేక్ కు “హిట్ – ది ఫస్ట్ కేస్” అనే టైటిల్ ను ఖరారు చేశారు.

Read Also : “లవ్ స్టోరీ” ట్రైలర్ కు ముహూర్తం ఖరారు

ఈ ఉదయం ముహూర్త వేడుకతో సినిమాను ప్రారంభించారు. ఈ చిత్ర ప్రారంభోత్సవానికి చిత్ర హీరో రాజ్‌కుమార్ రావు, దర్శకుడు డాక్టర్ శైలేష్ కొలను, నిర్మాతలు దిల్ రాజు, భూషణ్ కుమార్ హాజరయ్యారు. ఇప్పటికే ఈ సినిమా ప్రీ ప్రొడక్షన్ లాంఛనాలు పూర్తయ్యాయి. రెగ్యులర్ షూటింగ్ త్వరలో ముంబైలో ప్రారంభమవుతుంది. క్రిషన్ కుమార్, కుల్దీప్ రాథోడ్ ఈ చిత్రాన్ని సంయుక్తంగా నిర్మిస్తున్నారు. సినిమా డిజిటల్ స్ట్రీమింగ్ హక్కులను నెట్‌ఫ్లిక్స్ కొనుగోలు చేసింది.

కాగా తెలుగు చిత్రం “హిట్”లో విశ్వక్ సేన్, రుహానీ శర్మ ప్రధాన పాత్రల్లో నటించారు. హిందీ వెర్షన్‌ను టి-సిరీస్ భూషణ్ కుమార్, దిల్ రాజు, క్రిషన్ కుమార్, కుల్దీప్ రాథోడ్ నిర్మిస్తున్నారు.