Hanuman Ansh: ఎవడ్రా చిన్న సినిమా అన్నది? ‘ధురంధర్’ రికార్డును తుడిచిపెట్టేసిందిగా!

Hanuman Ansh: సాధారణంగా ఏ సినిమాకైనా మూడో వారం దాటితే థియేటర్లలో సందడి తగ్గిపోవడం సహజం. ఇక ఆరో వారం అంటే కలెక్షన్ల మాట అటుంచితే, అసలు షోలు ఉంటాయా అన్న సందేహం వస్తుంది. కానీ, బాలీవుడ్‌లో ప్రస్తుతం ఓ డివోషనల్ మూవీ మాత్రం బాక్సాఫీస్ లెక్కలనే తలకిందులు చేస్తోంది. ప్రముఖ ఆధ్యాత్మిక గురువు నీమ్ కరోలి బాబా జీవిత నేపథ్యంతో తెరకెక్కిన బయోగ్రాఫికల్ డ్రామా ‘హనుమాన్ అంశ్’ (#HanumanAnsh) థియేటర్లలో కనీవినీ ఎరుగని వసూళ్ల విధ్వంసం సృష్టిస్తోంది. ఈ సినిమా సృష్టిస్తున్న సంచలన రికార్డ్‌లలో కీ హైలైట్ ఏంటంటే దాని ఆరో వారం కలెక్షన్సే. గతంలో బాలీవుడ్ సంచలన చిత్రం ‘ధురంధర్’ ఆరో వారంలో రూ.28.95 కోట్లు రాబట్టి అత్యధిక వసూళ్ల రికార్డును తన పేరిట లిఖించుకుంది. అయితే తాజాగా ‘హనుమాన్ అంశ్’ ఆ మైలురాయిని సింపుల్‌గా దాటేసింది. ఒక్క ఆరో వారంలో కేవలం ఐదు రోజుల్లోనే ఏకంగా రూ. 64.87 కోట్ల నెట్ వసూళ్లను కొల్లగొట్టి, పాత రికార్డును రెట్టింపు మార్జిన్‌తో బద్దలు కొట్టింది. ఇంకా ఈ వారం పూర్తి కాకముందే ఈ స్థాయి నంబర్స్ నమోదు కావడం ట్రేడ్ వర్గాలను సైతం నివ్వెరపరుస్తోంది.

వీకెండ్‌లోనే కాకుండా సోమ, మంగళవారాల్లోనూ ఈ చిత్రానికి ప్రేక్షకుల తాకిడి ఏమాత్రం తగ్గలేదు. సోమవారం: రూ. 8.00 కోట్లు, మంగళవారం: రూ. 7.80 కోట్ల వసూల్లతో వర్కింగ్ డేస్‌లోనూ ఈ వసూళ్లు సినిమా పట్ల ప్రేక్షకుల్లో ఉన్న అపారమైన ఆదరణను స్పష్టం చేస్తున్నాయి. కంటెంట్‌లోని ఆధ్యాత్మిక లోతు, భావోద్వేగాలు ఫ్యామిలీ ఆడియన్స్‌ను పెద్ద ఎత్తున థియేటర్లకు రప్పిస్తున్నాయని ట్రేడ్ వర్గాలు చెబుతున్నాయి. తాజా లెక్కలతో కలిపి ఇప్పటి వరకు ఈ చిత్రం దేశవ్యాప్తంగా మొత్తంగా రూ. 218.03 కోట్ల నెట్ కలెక్షన్లను తన ఖాతాలో వేసుకుంది. బాక్సాఫీస్ వద్ద ఎదురేలేకుండా సాగుతున్న ఈ ప్రయాణం ఇంకా ముగియలేదు. రన్ బలంగా కొనసాగుతుండటంతో రాబోయే రోజుల్లో ఈ చిత్రం ఇంకెన్ని ఆల్-టైమ్ రికార్డులను తిరగరాస్తుందో వేచి చూడాలి.