నటనలో శిక్షణ అందిస్తూ ఎంతోమంది నూతన ప్రతిభావంతులను టాలీవుడ్కు అందిస్తున్న ప్రముఖ ‘వినోద్ ఫిల్మ్ అకాడమీ యాక్టింగ్ స్కూల్’ మరో అరుదైన ఘనతను సాధించింది. ప్రతిష్టాత్మకంగా నిర్వహించిన ‘కోడి రామకృష్ణ అవార్డ్స్ 2026’ వేడుకల్లో ఈ అకాడమీ “బెస్ట్ యాక్టింగ్ స్కూల్ ఇన్ హైదరాబాద్” పురస్కారాన్ని గెలుచుకుంది. ఈ వేడుకలో ఆంధ్రప్రదేశ్ రాష్ట్ర డిప్యూటీ స్పీకర్ రఘురామ కృష్ణంరాజు, సీనియర్ నటులు సుమన్, ప్రముఖ నిర్మాతలు అంబికా కృష్ణ, తుమ్మలపల్లి రామసత్యనారాయణ తదితర ప్రముఖుల దివ్యసన్నిధిలో అకాడమీ ప్రతినిధులు ఈ పురస్కారాన్ని అందుకున్నారు.
ఈ సందర్భంగా వినోద్ ఫిల్మ్ అకాడమీ వ్యవస్థాపకులు, నటుడు వినోద్ నువ్వుల ఆనందం వ్యక్తం చేస్తూ— “తెలుగు చలనచిత్ర పరిశ్రమలో చెరగని ముద్ర వేసిన దిగ్గజ దర్శకుడు కోడి రామకృష్ణపేరు మీద ఇస్తున్న ఈ అవార్డును మా అకాడమీ అందుకోవడం ఎంతో గర్వంగా ఉంది. ప్రముఖుల సమక్షంలో ఈ పురస్కారాన్ని స్వీకరించడం నా జీవితంలో చిరస్మరణీయమైన అనుభూతి” అని పేర్కొన్నారు. తమ సంస్థను నమ్మి అడుగుపెడుతున్న విద్యార్థులకు, నిరంతరం ప్రోత్సహిస్తున్న శ్రేయోభిలాషులకు వినోద్ నువ్వుల ప్రత్యేక కృతజ్ఞతలు తెలిపారు. భవిష్యత్తులోనూ తెలుగు సినీ పరిశ్రమకు మరింత నిబద్ధత కలిగిన, శిక్షణ పొందిన ఉత్తమ నటీనటులను అందించడమే తమ అకాడమీ ప్రధాన ధ్యేయమని ఆయన స్పష్టం చేశారు.