తమిళనాడు రాజకీయాల్లో సరికొత్త అధ్యాయం మొదలైంది. 2026 అసెంబ్లీ ఎన్నికల ఫలితాల్లో దళపతి విజయ్ తన ‘తమిళగ వెట్రి కళగం’ (TVK) పార్టీతో ప్రభంజనం సృష్టించారు. అంచనాలను తలకిందులు చేస్తూ TVK మెజారిటీ స్థానాలను కైవసం చేసుకోగా, అధికార DMK గట్టి ఎదురుదెబ్బ తింది. విజయ్ ముఖ్యమంత్రిగా బాధ్యతలు చేపట్టడం దాదాపు ఖాయం కావడంతో అటు రాజకీయంగానే కాకుండా సినీ ఇండస్ట్రీలో కూడా సంచలనం రేకెత్తించింది.
విజయ్ రాజకీయాల్లోకి వస్తూ నటించిన చివరి చిత్రం ‘జననాయగన్‘. ఈ సినిమా రిలీజ్ గత కొన్ని నెలలుగా సందిగ్ధంలో పడిన సంగతి తెలిసిందే. సెన్సార్ సర్టిఫికేట్ పేరుతో సాంకేతిక కారణాలతో పలుమార్లు వాయిదా వేస్తూ వచ్చారు. అయితే ఇప్పుడు విజయ్ ఎన్నికల్లో ఘనవిజయం సాధించడంతో ఈ పొలిటికల్ థ్రిల్లర్ విడుదలకు ఉన్న అడ్డంకులన్నీ తొలగిపోయాయి. మే 8న ఈ సినిమా థియేటర్లలోకి వచ్చేందుకు సిద్ధమవుతోంది. ‘జననాయగన్’ చిత్రం విడుదలకు ముందే ఆన్లైన్లో లీక్ అయినప్పటికీ విజయ్ క్రేజ్ మరియు తాజా రాజకీయ విజయం సినిమాపై అంచనాలను ఆకాశానికి చేర్చాయి. ప్రపంచ సినీ చరిత్రలోనే లీక్ అయిన ఒక సినిమా ‘ఇండస్ట్రీ హిట్’గా నిలవడం ఇదే మొదటిసారి అయ్యే అవకాశం ఉందని ట్రేడ్ వర్గాలు విశ్లేషిస్తున్నాయి. విజయ్ కొత్త ముఖ్యమంత్రిగా ఎన్నిక కాబోతున్న నేపథ్యంలో తమిళనాడు ప్రభుత్వం సినిమాల ప్రదర్శన సమయాలపై కీలక నిర్ణయం తీసుకునే అవకాశం ఉంది. అభిమానుల కోరిక మేరకు రాష్ట్రవ్యాప్తంగా అర్లీ మార్నింగ్ షోలకు అనుమతినిస్తూ కొత్త ‘జీవో’ వచ్చే అవకాశం ఉందని తెలుస్తోంది. ప్రస్తుతం ట్రేడ్ సర్కిల్స్లో ‘జననాయగన్’ హాట్ ప్రాపర్టీగా మారింది. మొదటి రోజే ఈ సినిమా బాక్సాఫీస్ వద్ద హిస్టరీ క్రియేటింగ్ ఓపెనింగ్స్ రాబట్టడం ఖాయమని అంచనా వేస్తున్నారు విజయ్ ఫ్యాన్స్.