బాలీవుడ్ బాట పట్టనున్న వరుణ్ తేజ్!
మెగా ఫ్యామిలీ యంగ్ హీరో వరుణ్ తేజ్ బాలీవుడ్ పై కన్నేశాడా!? అంటే అవుననే సమాధానమే వస్తోంది. ప్రస్తుతం బాక్సింగ్ నేపథ్యంలో ‘గని’ చిత్రంతో పాటు, వెంకటేశ్ తో కలిసి ‘ఎఫ్ 3’ మూవీలో నటిస్తున్నాడు వరుణ్ తేజ్. ఈ రెండు సినిమాలు కాస్తంత ముందు వెనుకగా ఈ యేడాదే విడుదల అవుతాయని తెలుస్తోంది. దీని తర్వాత వరుణ్ తేజ్ ఏ సినిమా చేస్తాడనే విషయంలో క్లారిటీ లేదు. అయితే అతి త్వరలోనే వరుణ్ తేజ్ హిందీలో ఓ సినిమాలో నటిస్తాడని అంటున్నారు. నూతన దర్శకుడు చెప్పిన కథకు వరుణ్ తేజ్ గ్రీన్ సిగ్నల్ ఇచ్చాడని, ప్రస్తుతం అడివి శేష్ తో ‘మేజర్’ మూవీని నిర్మిస్తున్న సోని పిక్చర్స్ ఎంటర్ టైన్ మెంట్ ఈ సినిమాను ప్రొడ్యూస్ చేయబోతోందని తెలుస్తోంది. కేవలం హిందీలోనే ఈ సినిమా రూపుదిద్దుకుంటుందని కొందరంటుంటే, తెలుగు, హిందీ భాషల్లో తెరకెక్కించి, ఆ తర్వాత ఇతర దక్షిణాది భాషల్లో డబ్ చేసి, పాన్ ఇండియా మూవీగా రిలీజ్ చేస్తారని మరికొందరు అంటున్నారు. ఏదేమైనా మెగా ఫ్యామిలీ యంగ్ హీరో బాలీవుడ్ బాట పట్టడం మాత్రం ఖాయమనే గుసగుసలు ఫిల్మ్ నగర్ లో బాగానే వినిపిస్తున్నాయి.