Varalaxmi Sarathkumar: “నాకు పిల్లలు పుట్టరని కాదు.. నేనే వద్దనుకున్నా”

Varalaxmi Sarathkumar: పెళ్లయిన వెంటనే “శుభవార్త ఎప్పుడు?” అంటూ సమాజం సంధించే ప్రశ్నలపై నటి వరలక్ష్మి శరత్‌‌కుమార్ నిర్మొహమాటంగా స్పందించారు. భవిష్యత్తులో తాను పిల్లలను కనకూడదని నిర్ణయించుకున్నట్లు స్పష్టం చేస్తూ, అందుకు గల బలమైన కారణాలను పంచుకున్నారు. 2024లో ముంబైకి చెందిన ప్రముఖ ఆర్ట్ గ్యాలరిస్ట్ నికోలాయ్ సచ్‌దేవ్‌ను పెళ్లాడిన వరలక్ష్మి, తాజాగా ఓ ఇంటర్వ్యూలో తన వైవాహిక జీవితం, కుటుంబ ప్రణాళికలపై మనసు విప్పారు. “నాకు పిల్లలు పుట్టరని కాదు.. పిల్లలు వద్దన్నది పూర్తిగా నా వ్యక్తిగత నిర్ణయం. దీనిపై నాకు స్పష్టమైన ఆలోచన ఉంది. ఈ విషయంలో నా భర్త పూర్తి సపోర్ట్ నాకుంది. ఆయన ఆలోచన కూడా ఇదే” అంటూ సమాజం వేసే ప్రశ్నలకు సూటిగా సమాధానమిచ్చారు.

కేవలం పిల్లలను కనడమే పేరెంటింగ్ కాదని, ఒక ప్రాణాన్ని లోకంలోకి తెచ్చి సరైన బాధ్యతతో పెంచగలమా లేదా అన్నది గుర్తించడమే నిజమైన పేరెంటింగ్ అని ఆమె తేల్చిచెప్పారు. ఆ బాధ్యతలను మోసేందుకు రెడీగా లేనప్పుడు పిల్లల జోలికి వెళ్లకపోవడమే ఉత్తమమైన నిర్ణయమని వరలక్ష్మి అభిప్రాయపడ్డారు. ఇప్పటికే నికోలాయ్ మొదటి వివాహం ద్వారా ఉన్న కుమార్తెను తాను సొంత బిడ్డలాగే చూసుకుంటున్నానని, అలాగే ఇంట్లో ఉన్న రెండు పెంపుడు కుక్కలను కూడా పిల్లల కంటే ఎక్కువగా ప్రేమిస్తున్నానని ఆమె తెలిపారు. ఒక స్టార్ నటిగా ఇలాంటి సున్నితమైన అంశంపై ఏమాత్రం తటపటాయించకుండా నిర్భయంగా మాట్లాడటం ఇప్పుడు ఇండస్ట్రీ వర్గాల్లోనూ, నెట్టింటా పెద్ద ఎత్తున చర్చకు దారితీసింది.