కన్నడ యువ కథానాయకుడు రిషి టాలీవుడ్ ఎంట్రీ ఇస్తున్న సినిమా ‘వద్దురా సోదరా’. ఇందులో ధన్యా బాలకృష్ణన్ హీరోయిన్ గా నటిస్తోంది. ఓ వినూత్న ప్రేమకథతో దర్శకుడు ఇస్లాహుద్దీన్ ఈ చిత్రాన్ని రూపొందించారు. కన్నడ, తెలుగు ద్విభాషా చిత్రంగా తెరకెక్కిన దీనిని స్వేచ్ఛా క్రియేషన్స్, స్టాబ్ ఫాబ్ ప్రొడక్షన్స్ సంయుక్తంగా తెలుగులోకి తీసుకొస్తున్నాయి. ధీరజ్ మొగిలినేని, అమ్రేజ్ సూర్యవంశీ నిర్మాతలు. సోమవారం ఉదయం ‘వద్దురా సోదరా’ సినిమా మోషన్ పోస్టర్ రిలీజ్ అయ్యింది. ఈ మోషన్ పోస్టర్ చూస్తే… ప్రేయసికి దూరమైన ఓ ప్రేమికుడి బాధ కనిపిస్తుంది. ‘నా ప్రేయసి తనకు ఇష్టంలేని వాడిని పెళ్లి చేసుకున్నప్పుడు, నేను లేకుండా తను ఎప్పుడూ సంతోషంగా ఉండలేనని చెప్పింది. అప్పటి నుంచి నేను కూడా సంతోషంగా ఉండటం మానేశాను. కానీ ఇప్పుడు ఒక సంతోషపు ముసుగు వేసుకుని బ్రతుకుతున్నాను’ అంటూ ఆ విఫల ప్రేమికుడు తన మనో వేదనను చెబుతాడు. దాంతో ఇదో పెయిన్ ఫుల్ లవ్ స్టోరీ అనేది అర్థమౌతోంది. ఈ మోషన్ పోస్టర్ కోసం హీరో రిషితోనే తెలుగు డబ్బింగ్ చెప్పించినట్టున్నారు. పదాలన్నీ పట్టిపట్టి పలికినట్టుగా తెలిసిపోతోంది.
నాగభూషణ, గ్రీష్మ శ్రీధర్, మహదేవ్ ప్రసాద్, భవానీ ప్రకాష్, అపూర్వ ఎస్ భరద్వాజ్ ఇతర కీలక పాత్రల్లో నటిస్తున్న ఈ చిత్రానికి సినిమాటోగ్రఫీ: విష్ణు ప్రసాద్ పి, దిలీప్ కుమార్ ఎంఎస్, సంగీతం: ప్రసన్న శివరామన్.
‘వద్దురా సోదరా’ మోషన్ పోస్టర్ విడుదల!
