వైవిధ్యభరితమైన పాత్రలతో టాలీవుడ్లో తనకంటూ ఒక ప్రత్యేక గుర్తింపు తెచ్చుకున్న యంగ్ అండ్ టాలెంటెడ్ హీరో సుహాస్ పుట్టినరోజు సందర్భంగా ఆయన నటిస్తున్న తాజా బహుభాషా చిత్రం ‘మండాడి’ నుంచి సరికొత్త ఇంటెన్స్ పోస్టర్ను మేకర్స్ విడుదల చేశారు. వైవిధ్యమైన కాన్సెప్ట్తో తెరకెక్కుతున్న ఈ చిత్రం పాన్ ఇండియా స్థాయిలో భారీ అంచనాలను క్రియేట్ చేస్తోంది. తాజాగా విడుదలైన బర్త్డే స్పెషల్ పోస్టర్లో సుహాస్ మునుపెన్నడూ చూడని సరికొత్త మేకోవర్తో, ఎంతో ఇంటెన్స్గా కనిపిస్తున్నారు. చేతికి ఉన్న ఉంగరం, గడియారం, ఆయన చుట్టూ ఉన్న వస్తువులు మరియు బాడీ లాంగ్వేజ్ చూస్తుంటే వెండితెరపై ఒక అదిరిపోయే యాక్షన్ సీక్వెన్స్తో మెప్పించబోతున్నారని స్పష్టమవుతోంది. ముఖ్యంగా ఈ సినిమాలో రానున్న బోట్ యాక్షన్ ఎపిసోడ్స్ ప్రేక్షకులకు సరికొత్త సినిమాటిక్ అనుభూతిని ఇస్తాయని చిత్ర బృందం ధీమా వ్యక్తం చేస్తోంది.
ఆర్ఎస్ ఇన్ఫోటైన్మెంట్ బ్యానర్పై ఎల్రెడ్ కుమార్ నిర్మిస్తున్న ఈ చిత్రానికి మతిమారన్ పుగళేంది దర్శకత్వం వహిస్తున్నారు. ఇందులో ప్రతిభావంతుడైన నటుడు సూరి, సుహాస్తో కలిసి ప్రధాన పాత్రలో నటిస్తుండగా, మహిమా నంబియార్ హీరోయిన్గా నటిస్తోంది. వీరితో పాటు సీనియర్ నటుడు సత్యరాజ్, రవీంద్ర విజయ్, మిథున్, బాల శరవణన్ ఇతర కీలక పాత్రలు పోషిస్తున్నారు. తెలుగు, తమిళం, కన్నడ, మలయాళం, హిందీ భాషల్లో సెప్టెంబర్ 10న ఈ చిత్రాన్ని ప్రపంచవ్యాప్తంగా భారీ స్థాయిలో విడుదల చేయనున్నారు. ఆంధ్రప్రదేశ్ మరియు తెలంగాణ రాష్ట్రాల్లో ఈ ప్రతిష్టాత్మక చిత్రాన్ని ప్రముఖ నిర్మాణ, పంపిణీ సంస్థ మైత్రి మూవీ డిస్ట్రిబ్యూటర్స్ ఎల్ఎల్పి గ్రాండ్గా థియేటర్లలోకి తీసుకువస్తోంది. ఇప్పటికే విడుదలైన ప్రచార చిత్రాలు సినిమాపై భారీ హైప్ను పెంచేశాయి.