సూర్య కథానాయకుడిగా రూపుదిద్దుకున్న ‘సూరారై పోట్రు’ తమిళంలోనే కాదు ‘ఆకాశం నీహద్దురా’ పేరుతో తెలుగులో డబ్ అయ్యి, ఓటీటీలో విడుదలైంది. విమర్శకుల ప్రశంసలు పొందడంతో పాటు సూర్య అభిమానులనూ అలరించింది. సుధా కొంగర దర్శకత్వంలో తమిళ, తెలుగు భాషల్లో ఈ సినిమాను నిర్మించిన సూర్య ఇప్పుడు హిందీలోనూ దీన్ని రీమేక్ చేస్తున్నట్టు తెలిపారు. సూర్యకు చెందిన 2డీ ఎంటర్ టైన్ మెంట్ తో పాటు అబుందాంతియా ఎంటర్ టైన్ మెంట్స్ అధినేత విక్రమ్ మల్హోత్రా ఈ సినిమాను హిందీలో నిర్మిస్తున్నారు.
Read Also : హర్షవర్ధన్ దర్శకత్వంలో సుధీర్ బాబు !
హిందీలో సూర్య పాత్రను ఎవరు చేయబోతున్నారనేది నిర్మాతలు తెలియచేయలేదు. కానీ మెగా ఫోన్ మాత్రం దర్శకురాలు సుధా కొంగరనే పట్టుకోబోతున్నారు. గతంలోనే ఆమె మాధవన్ తో ‘సాలా ఖద్దూస్’ (తెలుగు ‘గురు’) చిత్రాన్ని హిందీలో తీశారు. ఈ సందర్భంగా సూర్య మాట్లాడుతూ, ”’సూరారై పోట్రు’ పై ప్రేక్షకులు చూపించిన ప్రేమ, అభిమానం అపూర్వమైనవి. ఈ కథ విన్న సమయంలోనే ఇది పాన్ ఇండియా మూవీ అవుతుందని అనిపించింది. ఆ కథలోని ఆత్మ అలాంటిది. కెప్టెన్ గోపీనాథ్ కథను హిందీలోకి తీసుకెళ్ళడం ఆనందం ఉంది” అని అన్నారు. ‘సూరారై పోట్రు’ను హిందీలోనూ తెరకెక్కించడం ఆనందంగా ఉందని, మాతృకకు లభించినట్టే, హిందీలోనూ ఈ చిత్రానికి ఆదరణ లభిస్తుందనే ఆశాభావాన్ని సుధా కొంగర వ్యక్తం చేశారు.
