SS Rajamouli: ఎవరూ ఊహించని హీరోతో దర్శకధీరుడు రాజమౌళి కొత్త సినిమా?

SS Rajamouli: తెలుగు చిత్ర పరిశ్రమ ఖ్యాతిని ప్రపంచ వ్యాప్తంగా చాటిచెప్పిన దర్శకధీరుడు రాజమౌళి. బాహుబలి, ఆర్ఆర్ఆర్ వంటి చిత్రాలతో పాన్ ఇండియా స్థాయిని దాటి పాన్ వరల్డ్ స్థాయికి తెలుగు సినిమాను తీసుకెళ్లిన ఘనత ఆయనదే. ప్రస్తుతం జక్కన్న సూపర్ స్టార్ మహేష్ బాబు హీరోగా అత్యంత ప్రతిష్టాత్మకంగా ‘వారణాసి’ చిత్రాన్ని తెరకెక్కిస్తున్నారు. అనుకున్న టైంకి ఈ సినిమాను ప్రేక్షకుల ముందుకు తీసుకురావాలని జక్కన్న పక్కాగా ప్లాన్ చేస్తున్నారు. ఇదే సమయంలో ఆయన వారణాసి తర్వాత ఏ హీరోతో సినిమా చేయబోతున్నారనే చర్చ ఇప్పుడు అన్ని ఇండస్ట్రీలో ఆసక్తిగా మారింది. గతంలో రాజమౌళి తర్వాత సినిమా ఐకాన్ స్టార్ అల్లు అర్జున్‌తో ఉండబోతుందని జోరుగా ప్రచారం జరిగింది. అయితే దీనిపై అల్లు అర్జున్ కానీ, రాజమౌళి టీం కానీ ఎలాంటి ప్రకటన చేయలేదు.

అయితే ప్రస్తుతం దర్శకధీరుడు ఎస్.ఎస్. రాజమౌళి, సౌత్ స్టార్ హీరో సూర్య కాంబినేషన్‌లో సినిమా రాబోతుందనే వార్తలు సోషల్ మీడియాలో జోరందుకున్నాయి. ఇండస్ట్రీ వర్గాల సమాచారం ప్రకారం.. సూర్యతో సినిమా చేయడానికి రాజమౌళి సానుకూలంగా ఉన్నారని ప్రచారం జరుగుతోంది. ఒకవేళ ఈ వార్త నిజమైతే, ఇండియన్ సినీ ఇండస్ట్రీలో అత్యంత క్రేజీ కాంబినేషన్లలో ఇది ఒకటిగా నిలవడం ఖాయం అని ట్రేడ్ వర్గాలు అభిప్రాయపడుతున్నాయి. నిజానికి సూర్య-రాజమౌళి కాంబినేషన్‌పై ఇలాంటి వార్తలు రావడం ఇదే మొదటిసారి కాదు. ఇలాంటి వార్తలు గతంలో కూడా తెగ హల్‌చల్ చేశాయి. గతంలో రాజమౌళి తెరకెక్కించిన ‘మగధీర’ చిత్రంలో హీరోగా ముందు సూర్య పేరును పరిశీలించినట్లు అప్పట్లో జోరుగా ప్రచారం కూడా జరిగింది. అయితే కొన్ని కారణాల వల్ల ఆ ప్రాజెక్ట్ కార్యరూపం దాల్చలేదు. అనంతరం కూడా పలుమార్లు వీరిద్దరూ కలిసి సినిమా చేయబోతున్నారనే వార్తలు వినిపించినప్పటికీ, అవి అధికారికంగా ఎప్పుడూ ప్రకటించలేదు. తాజాగా మరోసారి ఈ కాంబినేషన్‌పై మరోసారి వార్తలు రావడంతో సూర్య అభిమానులు మస్త్ ఖుషీ అవుతున్నారు. అయితే ఇప్పటివరకు ఈ ప్రాజెక్ట్‌పై రాజమౌళి, సూర్య నుంచి ఎలాంటి అధికారిక ప్రకటన బయటికి రాలేదు.