SriGouriPriya: ‘మిస్ హైదరాబాద్’ నుంచి హీరోయిన్ వరకు.. తన జర్నీ గురించి చెప్పిన చెన్నై లవ్ స్టోరీ హీరోయిన్!

SriGouriPriya: ఇటీవల విడుదలైన ‘చెన్నై లవ్ స్టోరీ’ సినిమాతో హీరోయిన్ శ్రీ గౌరీ ప్రియ తన నటనతో ప్రేక్షకులను ఆకట్టుకున్నారు. తాజాగా ఆమె ఓ ఇంటర్వ్యూలో తన కెరీర్, చదువు, సంగీతంపై గురించి పలు ఆసక్తికర విషయాలు వెల్లడించారు. ఈ సందర్భంగా ఆమె మాట్లాడుతూ.. తాను ఎప్పుడూ టీవీ యాంకర్‌గా పనిచేయలేదని, చిన్నప్పటి నుంచి కర్ణాటక సంగీతం, లలిత సంగీతం నేర్చుకుంటూ పెరిగానని అన్నారు. ప్రొఫెషనల్ సింగర్‌గా మారకపోయినా, పలు రియాలిటీ షోలలో పాల్గొన్నానని చెప్పారు. ఆ కార్యక్రమాల ద్వారానే ఎంటర్‌టైన్‌మెంట్ ఇండస్ట్రీపై కొంత అవగాహన వచ్చిందని వెల్లడించారు.

2018లో ‘మిస్ హైదరాబాద్’ టైటిల్ గెలుచుకోవడం తన జీవితంలో కీలక మలుపు అని, ఆ తర్వాత కరోనా కారణంగా రెండేళ్ల విరామం వచ్చినట్లు చెప్పారు. కోవిడ్ సమయంలోనే ఆహాలో వచ్చిన ‘మెయిల్’ వెబ్‌సిరీస్‌తో తనకు తొలి అవకాశం లభించిందని, అక్కడి నుంచే వరుసగా సినిమా అవకాశాలు రావడం ప్రారంభమైందన్నారు. తాను హైదరాబాద్‌లోని సెయింట్ ఫ్రాన్సిస్ కాలేజీలో బ్యాచిలర్ ఆఫ్ మేనేజ్‌మెంట్ స్టడీస్ (BMS) పూర్తి చేశానని, మార్కెటింగ్, మేనేజ్‌మెంట్ అంశాలపై తనకు ప్రత్యేక ఆసక్తి ఉందని చెప్పారు. అయితే హీరోయిన్ అవుతానని కూడా ఎప్పుడూ ఊహించలేదని, భవిష్యత్తులో ఏమి జరుగుతుందో ఇప్పుడే చెప్పలేనని అన్నారు. చిన్నప్పటి నుంచే తల్లిదండ్రులు చదువుతో పాటు ఒక అదనపు నైపుణ్యం ఉండాలని భావించి సంగీతం నేర్పించారని చెప్పారు. అలాగే డిబేట్స్, ఎలక్యూషన్స్, డ్యాన్స్, స్పోర్ట్స్ వంటి ప్రతి పోటీలో పాల్గొనేదానినని తెలిపారు. అందువల్లే స్టేజ్ ఫియర్ ఎప్పుడూ రాలేదని, పాల్గొనడమే ముఖ్యమనే ఆలోచన చిన్న వయసులోనే అలవడిందన్నారు. ఇక భవిష్యత్తులో సినిమాల్లో పాట పాడే అవకాశం వస్తే తప్పకుండా పరిశీలిస్తానని అన్నారు. అయితే అది దర్శకులు, నిర్మాతల నిర్ణయమని, సరైన సమయం వచ్చినప్పుడు ఆ అవకాశం వస్తుందని ఆశాభావం వ్యక్తం చేశారు.