Siddu Jonnalagadda: ‘డీజే టిల్లు’, ‘టిల్లు స్క్వేర్’ సినిమాలతో బాక్సాఫీస్ వద్ద సెన్సేషన్ క్రియేట్ చేసి, నిజంగానే ‘స్టార్ బాయ్’ అనిపించుకున్నాడు సిద్ధు జొన్నలగడ్డ. ముఖ్యంగా ‘టిల్లు స్క్వేర్’ ఏకంగా రూ. 60 కోట్లకు పైగా షేర్ రాబట్టడంతో సిద్ధు రేంజ్ ఒక్కసారిగా మారిపోయింది. కానీ ఆ తర్వాత సిద్ధు వేసిన అడుగులు తారుమారయ్యాయి. వరుస ఫ్లాపులతో పాటు అనౌన్స్ చేసిన భారీ ప్రాజెక్టులు కూడా ఆగిపోవడంతో ఏడాది పాటు సిల్వర్ స్క్రీన్‌కు దూరమయ్యాడు. ఎట్టకేలకు తప్పు ఎక్కడ జరిగిందో తెలుసుకున్న సిద్ధు, ఇప్పుడు సరికొత్త ప్లాన్‌తో కమ్‌బ్యాక్ ఇవ్వడానికి రెడీ అయినట్లు కనిపిస్తున్నాడు.
స్వతహాగా మంచి రైటర్ అయిన సిద్ధు, ‘టిల్లు స్క్వేర్’ తర్వాత కథల ఎంపికలో అంచనా తప్పాడు. ఫామ్ కోల్పోయిన బొమ్మరిల్లి భాస్కర్ దర్శకత్వంలో చేసిన ‘జాక్’ సినిమా కనీసం రూ. 10 కోట్లు కూడా రాబట్టలేక భారీ డిజాస్టర్‌గా నిలిచింది. ఆ తర్వాత కాస్ట్యూమ్ డిజైనర్ నీరజ కోనను దర్శకురాలిగా పరిచయం చేస్తూ చేసిన రొమాంటిక్ ఎంటర్‌టైనర్ ‘తెలుసు కదా’ కూడా ఆడియన్స్‌ను మెప్పించలేకపోయింది. 2025 దసరాకు రిలీజైన ఈ సినిమా తర్వాత సిద్ధు మరో మూవీతో ప్రేక్షకుల ముందుకు రాలేదు. కేవలం హీరోగానే కాకుండా, రవితేజ ‘మిస్టర్ బచ్చన్’, సుమంత్ ‘మహేంద్రగిరి వారాహి’ సినిమాల్లో గెస్ట్ రోల్స్ చేసినా అవి కూడా నిరాశపరిచాయి.
సిద్ధు కెరీర్‌లో గ్యాప్ రావడానికి ప్రధాన కారణం రెండు పెద్ద సినిమాలు క్యాన్సిల్ అవ్వడమే. ‘టిల్లు’ సినిమాలను నిర్మించిన సితార ఎంటర్‌టైన్‌మెంట్స్ సంస్థ, సిద్ధుతో ‘టిల్లు క్యూబ్’ కాకుండా ‘కృష్ణ అండ్ హిస్ లీలా’ ఫేమ్ రవికాంత్ పేరేపు దర్శకత్వంలో ‘బ్యాడ్స్’ అనే ఫ్రెష్ ప్రాజెక్ట్ ప్రకటించింది. కానీ ఏం జరిగిందో తెలియదు కానీ ఈ సినిమా పట్టాలెక్కలేదు. తర్వాత కోహినూర్ వజ్రాన్ని ఇండియాకు తిరిగి తీసుకొచ్చే ఇంట్రెస్టింగ్ కాన్సెప్ట్‌తో, రెండు భాగాలుగా భారీ బడ్జెట్‌తో ‘కోహినూర్ పార్ట్-1’ పోస్టర్ కూడా రిలీజ్ చేశారు. 2026 సంక్రాంతికి రావాల్సిన ఈ సినిమా బడ్జెట్ కారణాల వల్ల పక్కన పెట్టేశారు.
ఏడాది పాటు ఎదురైన చేదు అనుభవాల నుంచి పాఠాలు నేర్చుకున్న సిద్ధు, ఇప్పుడు ఆ గ్యాప్‌ను భర్తీ చేయడానికి రెండు ఆసక్తికరమైన సినిమాలను లైన్‌లో పెట్టాడు. ఇందులో ఒకటి ‘ఏజెంట్ సాయి శ్రీనివాస ఆత్రేయ’ ఫేమ్ స్వరూప్ ఆర్ఎస్‌జే దర్శకత్వంలో తెరకెక్కుతున్న సినిమా. మరోవైపు సుకుమార్ రైటింగ్స్, బన్నీ వాస్ సంయుక్తంగా నిర్మిస్తున్న కొత్త సినిమా. దీని షూటింగ్ కూడా బుధవారం లాంఛనంగా ప్రారంభమైంది. మోహన్ బి దర్శకత్వం వహిస్తున్న ఈ సినిమా పోస్టర్ చూస్తుంటే సిద్ధు ఈసారి పూర్తిస్థాయి లవ్ స్టోరీతో రాబోతున్నట్లు స్పష్టమవుతోంది. ‘ఆయ్’, ‘రాకాస’ సినిమాలతో ఆకట్టుకున్న నయన్ సారిక ఇందులో హీరోయిన్‌గా నటిస్తుండగా, జీవీ ప్రకాష్ కుమార్ సంగీతం అందిస్తున్నారు. మరి ఈ రెండు సినిమాలతోనైనా సిద్ధు మళ్లీ తన పాత ఫామ్‌ను అందుకుంటాడో లేదో చూడాలి.