Irumudi Censor : మాస్ మహారాజా రవితేజ ‘ఇరుముడి’ సెన్సార్ రిపోర్ట్.. రన్ టైమ్ ఎంతంటే?

మాస్ మహారాజా రవితేజ కథానాయకుడిగా నటిస్తున్న సరికొత్త చిత్రం ‘ఇరుముడి’. ఈ నెల 21న వరల్డ్ వైడ్ గా రిలీజ్ కాబోతుంది. ఈ నేపథ్యంలో సెన్సార్ కార్యక్రమాలను విజయవంతంగా పూర్తి చేసుకుంది. సెన్సార్ బోర్డు ఈ చిత్రానికి ‘U/A’ సర్టిఫికెట్ జారీచేసారు. మొత్తం 2 గంటల 25 నిమిషాల క్రిస్పీ రన్‌టైమ్‌ను మేకర్స్ లాక్ చేశారు. సెన్సార్ సభ్యుల నుంచి ఈ సినిమాకు చాలా మంచి రెస్పాన్స్ వచ్చినట్లు ఫిల్మ్‌నగర్ వర్గాల్లో టాక్ నడుస్తోంది.

ఈ చిత్రానికి తండ్రి-కూతుళ్ల సెంటిమెంట్ ప్రధాన బలంగా నిలవనుందని, దానికి తోడు క్రైమ్ సస్పెన్స్ డ్రామా ఎలిమెంట్స్ కూడా అద్భుతంగా వర్కౌట్ అయ్యాయని తెలుస్తోంది. ముఖ్యంగా కథానాయకుడి పాత్ర అయ్యప్ప మాల వేసుకున్న తర్వాత అతని ప్రవర్తనలో, క్యారెక్టర్‌లో వచ్చే మార్పులు సినిమాకే ప్రధాన హైలైట్‌గా నిలవనున్నాయి. దర్శకుడు శివ నిర్వాణ టేకింగ్, కథనాన్ని నడిపిన తీరుతో పాటు జి.వి. ప్రకాష్ కుమార్ అందించిన సంగీతం సినిమాకు పెద్ద ప్లస్ పాయింట్ అయ్యాయని సమాచారం. ముఖ్యంగా ‘అయ్యప్ప స్వామి ఇరుముడి కట్టు’, ‘మల్లెపూల పల్లకి’ పాటలతో పాటు ఆయన అందించిన రీ-రికార్డింగ్  ఈ చిత్రానికి ప్రధాన పిల్లర్స్‌గా నిలిచాయని చెబుతున్నారు. అయితే, ఈ చిత్రంలోని ‘మల్లెపూల పల్లకి’ పాటలో మెగా పవర్ స్టార్ రామ్ చరణ్ క్యామియో రోల్ చేస్తున్నారంటూ గత కొన్ని రోజులుగా సోషల్ మీడియాలో ప్రచారం సాగింది. దీనిపై దర్శకుడు శివ నిర్వాణ స్పందిస్తూ క్లారిటీ ఇచ్చారు. ‘మల్లెపూల పల్లకి’ పాటలో రామ్ చరణ్ క్యామియో ఉందనే వార్తల్లో ఎలాంటి నిజం లేదని ఆయన స్పష్టం చేశారు.