Rajni Autobiography : ఆత్మకథ రాస్తున్న రజనీ.. సినిమాగా తీస్తే అదొక అద్భుతమే

సూపర్‌స్టార్ రజనీకాంత్ బస్ కండక్టర్ గా జీవితాన్ని మొదలుపెట్టి నేడు ఇండియన్ సూపర్ స్టార్ గా ఎదిగి ఎందరికో ఆదర్శప్రాయంగా నిలిచారు. రజనీ అంటే ఒక స్టైల్ రజనీ అంటే ఒక ఎమోషన్.. రజనీ అంటే స్వాగ్.. ఎంతటి సూపర్ స్టార్ గా ఎదిగిన ఒదిగి ఉండడం రజనీకే చెల్లింది. ఆలాంటి ఆయన జీవితం ఎందరికో ఆదర్శం. ఇందుకోసమే రజనీ జీవిత ప్రయానాన్ని  త్వరలోనే ఆత్మకథ రూపంలో పాఠకుల ముందుకు తీసుకువస్తున్నారు. ఈ విషయాన్ని ఆయన కుమార్తె, దర్శకురాలు సౌందర్య రజనీకాంత్ అధికారికంగా స్పష్టం చేశారు.

రజనీకాంత్ తనఆత్మకథను స్వయంగా తానే రచిస్తున్నారని, ఈ రచన ఎంతోమందికి గొప్ప స్ఫూర్తిని అందిస్తుందని తెలిపారు. ఐదు దశాబ్దాల సుదీర్ఘ సినీ ప్రయాణంలో రజనీకాంత్ సాధించిన అద్భుత విజయాలు, ఆయన వ్యక్తిగత జీవితం, ఒక సామాన్య స్థాయి నుండి భారతీయ చిత్రసీమలోనే టాప్ స్థానానికి చేరుకోవడానికి ఎదుర్కొన్న ఎన్నో సవాళ్లు ఈ పుస్తకంలో పొందుపరచనున్నట్లు తెలిపారు. “నాన్నగారి జీవితకథ రాబోయే తరాలకు పాఠం లాంటిది. ఒకవేళ భవిష్యత్తులో ఈ ఆత్మకథను సినిమాగా తీస్తే మాత్రం అది చాలా ప్రత్యేకం, విశిష్టమైన ప్రాజెక్ట్‌గా నిలిచిపోతుంది” అని సౌందర్య పేర్కొన్నారు. మరోవైపు, రజనీకాంత్ ‘జైలర్ 2’ షూటింగ్‌తో పాటు తన కొత్త చిత్రం ‘ధర్మన్’ సెట్స్‌లో బిజీగా ఉన్నారు. బ్యాక్ టు బ్యాక్ సినిమాలతో బిజీ షెడ్యూల్ గడుపుతున్నప్పటికీ కాస్త సమయం ఖాళీ దొరికినా తన ఆత్మకథను రాయడానికే కేటాయిస్తున్నారని ఆమె వెల్లడించారు. మరి రజనీ ఆత్మకథలో ఎలాంటి విషయాలు ఉంటాయో చూడాలి.