Radha Krishna: చాలా కాలం తర్వాత మీడియా ముందుకు రాధే శ్యామ్ దర్శకుడు

Radha Krishna: రెబల్ స్టార్ ప్రభాస్ హీరోగా రూపొందిన భారీ పీరియాడిక్ రొమాంటిక్ డ్రామా ‘రాధే శ్యామ్’ తర్వాత దర్శకుడు రాధాకృష్ణ కుమార్ పెద్దగా ఎక్కడా కనిపించలేదు. ఆ సినిమా ఆశించిన స్థాయిలో విజయం సాధించకపోవడంతో ఆయన కొంతకాలం పాటుసినీ వేడుకలకు, మీడియాకు దూరంగా ఉన్నారు. అయితే, తాజాగా ఆయన చాలా రోజుల తర్వాత ఒక సినీ వేడుకలో పాల్గొని అందరి దృష్టిని ఆకర్షించారు. ‘డోంట్ స్లీప్’ చిత్ర టీజర్ లాంచ్ కార్యక్రమానికి రాధాకృష్ణ కుమార్ ముఖ్య అతిథిగా హాజరయ్యారు. వేదికపైకి వచ్చిన ఆయనను యాంకర్ సాదరంగా ఆహ్వానించగా, చిత్ర యూనిట్‌కు తన శుభాకాంక్షలు తెలిపారు.

ఈ వేదికపై దర్శకుడు రాధాకృష్ణ మాట్లాడుతూ చిత్ర దర్శకుడు శ్యామ్ తో తనకున్న అనుబంధాన్ని గుర్తుచేసుకున్నారు. “డోంట్ స్లీప్ చిత్ర బృందానికి ముందుగా నా శుభాకాంక్షలు. శ్యామ్ భాయ్ నాకు దాదాపు 22 ఏళ్లుగా తెలుసు. ఆయన నాకు కేవలం మంచి స్నేహితుడే కాదు, నా మెంటార్, సోదరుడిలాంటి వ్యక్తి. మేము ఏం చేసినా, ఎలా చేసినా ప్రతిసారీ కలిసి చర్చించుకునేవాళ్లం. ఆయన ఎప్పుడూ కొత్త టెక్నిక్స్, సినిమా మేకింగ్‌లో సరికొత్త పద్ధతులను ఆలోచిస్తుంటారు.”

ఈ సినిమాను ఆయన ఎలా తెరకెక్కించారో నాకు చెప్పినప్పుడు నిజంగానే చాలా ఆశ్చర్యపోయాను. తక్కువ బడ్జెట్‌లో, ఎంతో వేగంగా సినిమాలను ఎలా రూపొందించవచ్చో మనమందరం ఇలాంటి ప్రయత్నాల నుంచి నేర్చుకోవాలని ఆశిస్తున్నాను. చిత్ర హీరో, హీరోయిన్లతో పాటు యూనిట్ మొత్తానికి మంచి విజయం దక్కాలని, వారి జర్నీ విజయవంతంగా సాగాలని కోరుకుంటున్నాను” అని పేర్కొన్నారు. చాలా కాలం తర్వాత మీడియా కంటపడిన రాధాకృష్ణ మాటలు సినీ వర్గాల్లో ఆసక్తిని రేకెత్తించాయి. ప్రస్తుతం ఆయన తన తదుపరి ప్రాజెక్ట్‌పై దృష్టి పెట్టినట్లు సమాచారం.