మెగా పవర్ స్టార్ రామ్ చరణ్ పెద్ది బాక్సాఫీస్ వద్ద ప్రభంజనం ఆగడం లేదు. జూన్ 3న ప్రీమియర్స్ తో రిలీజ్ అయిన ఈ స్పోర్ట్స్ యాక్షన్ డ్రామా థియేటర్లలో కలెక్షన్ల తుఫాను సృష్టిస్తోంది. విడుదలైన నాలుగు రోజుల్లోనే భారీ వసూళ్లు రాబట్టింది “బాక్సాఫీస్ ఛాంపియన్” అనే ట్యాగ్ను వందకు వంద శాతం నిజం చేస్తూ అన్ని ప్రాంతాలలోనూ ఈ చిత్రం కలెక్షన్ల సునామీ సృష్టిస్తోంది. ప్రీమియర్స్తో కలిపి మొటిరోజు రూ. 135 కోట్ల కొల్లగొట్టిన పెద్ది.. రెండో రోజుల్లో రూ. 181 కోట్లు రాబట్టింది. ఇక మూడు రోజుల్లోనే రూ. 236 కోట్లు సాధించగా.. నాలుగు రోజుల్లోనే ట్రిపుల్ సెంచరీ చేస్తుందని అనుకున్నారు. కానీ ఆ మార్క్ ను కొద్దిలో మిస్ అయింది పెద్ది.
నాలుగు రోజులకుగాను ఫస్ట్ వీకెండ్ ముగిసేనాటికి ఈ చిత్రం ప్రపంచవ్యాప్తంగా రూ.292.5 కోట్ల గ్రాస్ కలెక్షన్స్ రాబట్టినట్టుగా మేకర్స్ అధికారికంగా ప్రకటించారు. సినిమాకు లభించిన హిట్ టాక్, దానికి తోడు లాంగ్ వీకెండ్ సెలవులు కలిసి రావడంతో థియేటర్లన్నీ హౌస్ఫుల్ బోర్డులతో కళకళలాడాయి. మాస్, క్లాస్ అనే తేడా లేకుండా అన్ని వర్గాల ప్రేక్షకులు థియేటర్లకు క్యూ కడుతున్నారు. వీకెండ్ ముగిసినప్పటికీ ఈ సినిమా జోరు తగ్గేలా కనిపించడం లేదు. రెండు తెలుగు రాష్ట్రాలలో బయ్యర్లందరినీ భారీ లాభాల జోన్లోకి తీసుకెళ్లేలా ‘పెద్ది’ బాక్సాఫీస్ రన్ సాగుతోంది. ఈ 4 రోజుల సాలిడ్ కలెక్షన్లను బట్టి చూస్తుంటే రాబోయే రోజుల్లో ఈ చిత్రం మరిన్ని మునుపటి రికార్డులను బద్దలు కొట్టడం ఖాయంగా కనిపిస్తోంది.