Nandamuri Mokshagna : నేడు చిన్న సింబా బర్త్ డే.. ఎంట్రీ అప్డేట్ ఉంటుందా ?

నటసింహం నందమూరి బాలకృష్ణ తనయుడు మోక్షజ్ఞ తేజ పుట్టినరోజు సందర్భంగా టాలీవుడ్‌లో ఆయన సినీ ఎంట్రీపై మరోసారి ఆసక్తికరమైన చర్చ మొదలైంది. చాలా కాలంగా మోక్షజ్ఞ వెండితెర అరంగేట్రం గురించి అనేక రకాల వార్తలు వస్తున్నప్పటికీ, ఇప్పటివరకు మేకర్స్ నుంచి ఎలాంటి అధికారిక ప్రకటన వెలువడలేదు. దీంతో నందమూరి అభిమానులు మోక్షు ఫస్ట్ మూవీ అనౌన్స్‌మెంట్ కోసం ఎంతో ఆతృతగా ఎదురుచూస్తున్నారు.

గతంలో హనుమాన్ దర్శకుడు ప్రశాంత్ వర్మతో సినిమా అనుకుని ఆగిపోయింది. ఆ తర్వాత పలువురు ప్రముఖ దర్శకుల పేర్లు పరిశీలనలోకి వచ్చినప్పటికీ అవేవి కార్యరూపం దాల్చలేదు. అయితే ప్రస్తుతం ‘బింబిసార’ ఫేమ్ వశిష్ఠ దర్శకత్వంలో మోక్షజ్ఞ తన మొదటి సినిమా చేయబోతున్నారనే ప్రచారం సోషల్ మీడియాలో జోరుగా సాగుతోంది. ఈ ప్రాజెక్ట్‌ను ఒక భారీ యాక్షన్ ఎంటర్‌టైనర్‌గా ప్లాన్ చేస్తున్నట్లు ఫిలిం నగర్ వర్గాల్లో టాక్ వినిపిస్తోంది. ఈ సినిమాలో నటసింహం బాలకృష్ణ సుమారు 15 నిమిషాల నిడివి ఉన్న ఓ పవర్ ఫుల్ కేమియో రోల్‌లో కనిపించనున్నారని కూడా రూమర్ వినిపిస్తోంది. అంతేకాకుండా మోక్షజ్ఞ సరసన కథానాయికగా టాలీవుడ్ మోస్ట్ హ్యాపెనింగ్ బ్యూటీ శ్రీలీలను పరిశీలిస్తున్నట్లు వార్తలు వస్తున్నాయి.నేడు మోక్షజ్ఞ బర్త్ డే కావడం, పైగా ఈ ప్రాజెక్ట్‌పై సస్పెన్స్ కొనసాగుతుండటంతో.. ఈ రోజే ఈ క్రేజీ కాంబినేషన్‌పై ఏమైనా అఫీషియల్ అప్‌డేట్ వస్తుందా లేదా అనేది హాట్ టాపిక్‌గా మారింది. బాలకృష్ణ తన కుమారుడి ఎంట్రీ విషయంలో పూర్తి జాగ్రత్తలు తీసుకుంటుండటంతో, అభిమానులు ఆశగా ఎదురుచూస్తున్న అధికారిక ప్రకటన ఎప్పుడు వస్తుందో చూడాలి.