Nandamuri Balakrishna: టాలీవుడ్ అగ్ర నటుడు, హిందూపురం ఎమ్మెల్యే నందమూరి బాలకృష్ణకు మోకాలి శస్త్రచికిత్స విజయవంతంగా పూర్తైంది. ఆయనకు హైదరాబాద్లోని ఏఐజీ ఆస్పత్రిలో ఈ ఆపరేషన్ నిర్వహించారు. దాదాపు మూడు గంటల పాటు కొనసాగిన ఈ శస్త్రచికిత్స ఎలాంటి ఇబ్బందులు లేకుండా విజయవంతంగా పూర్తయినట్లు ఆస్పత్రి వర్గాలు వెల్లడించాయి. బాలకృష్ణ ఎడమ మోకాలిలోని క్వాడ్రిసెప్స్ టెండన్ (Quadriceps Tendon) గాయాన్ని నయం చేసేందుకు ఈ శస్త్రచికిత్స చేసినట్లు వైద్యులు తెలిపారు. ఆపరేషన్ సమయంలో ఎలాంటి సమస్యలు తలెత్తలేదని వెల్లడించారు.
కాకినాడ పోర్ట్ పరిసర ప్రాంతాల్లో జరుగుతున్న NBK111 సినిమా చిత్రీకరణలో ఒక భారీ యాక్షన్ సీన్ చేస్తుండగా బాలయ్య మోకాలుకి తీవ్ర గాయమైన సంగతి తెలిసిందే. ప్రాథమిక చికిత్స అనంతరం ఆయన ఏఐజీ ఆస్పత్రిలో చేరారు. ప్రస్తుతం బాలకృష్ణ ఆరోగ్య పరిస్థితి నిలకడగా ఉందని, శస్త్రచికిత్స అనంతర వైద్యుల పర్యవేక్షణలో ఉన్నారని ఏఐజీ ఆస్పత్రి వర్గాలు తెలిపాయి. బాలకృష్ణ త్వరగా కోలుకోవాలని అభిమానులు, సినీ ప్రముఖులు ఆకాంక్షిస్తున్నారు.