ఆదిత్ అరుణ్, శివాని రాజశేఖర్ హీరోహీరోయిన్లుగా నటిస్తున్న కామెడీ రొమాంటిక్ ఎంటర్టైనర్ “డబ్ల్యూడబ్ల్యూడబ్ల్యూ”. హూ వేర్ వై అనేది దాని అర్థం. కె.వి.గుహన్ దర్శకత్వంలో రూపొందుతున్న ఈ యూత్ ఫుల్ ఎంటర్ టైనర్ లో ప్రియదర్శి, వివా హర్ష, దివ్య, రియాజ్ ఖాన్, సత్యం రాజేష్ కీలకమైన పాత్రలో నటిస్తున్నారు. ఈ సినిమాను డాక్టర్ రవి ప్రసాద్ రాజు దాట్ల నిర్మిస్తున్నారు. రామంత్ర క్రియేషన్స్ బ్యానర్ పై తెరకెక్కుతోంది. తాజాగా ఈ చిత్రం నుంచి “మిన్నాలై” అనే లిరికల్ మెలోడీ సాంగ్ ను విడుదల చేశారు. తమిళ భాషలో ఉన్న ఈ వీడియో సాంగ్ ను హిప్ హాప్ తమిజ విడుదల చేశారు. అయితే అంతకుముందే ఈ మెలోడీ సాంగ్ ను “కన్నులు చెదిరే” అంటూ తెలుగులో యంగ్ హీరో అడవి శేష్ ఈ సాంగ్ ను విడుదల చేశారు. ఈ రొమాంటిక్ మెలోడీ సాంగ్ ను తెలుగు, తమిళ భాషల్లో యాజిన్ నిజార్ ఆలపించగా… అనంతశ్రీరామ్ తెలుగు లిరిక్స్, కార్తీక్ తమిళ లిరిక్స్ అందించారు. సైమన్ కె కింగ్ ఈ చిత్రానికి సంగీతం అందించారు.
