Anupama Parameswaran: పెళ్లిళ్లు, పిల్లల పెంపకంపై ఇటీవల సోషల్ మీడియాలో జరుగుతున్న రచ్చకు హీరోయిన్ అనుపమ పరమేశ్వరన్ ఫుల్‌స్టాప్ పెట్టారు. ‘క్రేజీ కళ్యాణం’ సక్సెస్ మీట్ వేదికగా ఆమె మాట్లాడుతూ, తన మాటలను కొందరు సగం కట్ చేసి తప్పుగా వైరల్ చేశారని అసహనం వ్యక్తం చేశారు. పెళ్లి వద్దని తాను ఎక్కడా అనలేదని, తన వ్యాఖ్యల వెనుక ఉన్న అసలు ఉద్దేశాన్ని స్పష్టంగా వివరించారు. గతంలో సీనియర్ నటుడు నరేష్ ఓ ఇంటర్వ్యూలో “పెళ్లి కాకపోయినా పర్లేదు.. పిల్లల్ని మాత్రం కనండి” అన్న వ్యాఖ్యలపై మొన్నటి ప్రెస్ ఇంటర్వ్యూలో అనుపమను ప్రశ్న అడిగారు. దానికి ఆమె బదులిస్తూ పెళ్లి ప్రాధాన్యత గురించి మాట్లాడితే, కొందరు కేవలం సగం బిట్ మాత్రమే కట్ చేసి నెట్టింట పోస్ట్ చేశారు. దాంతో అనుపమ పెళ్లికి వ్యతిరేకమంటూ ప్రచారం మొదలైంది.
ఈ వివాదంపై వేదికపైనే ఉన్న నరేష్ పక్కనే కూర్చుని అనుపమ ఓపెన్‌గా మాట్లాడారు. “పెళ్లి చేసుకోవడంలో ఎలాంటి తప్పు లేదు, పెళ్లి వద్దని నేను ఎక్కడా చెప్పలేదు. కానీ ఈ రోజుల్లో కేవలం పిల్లల కోసమే పెళ్లి చేసుకుని, ఆ తర్వాత సర్దుకుపోలేక విడాకులు తీసుకుంటున్న వాళ్లు చాలామంది ఉన్నారు. అలా చేయడం కరెక్ట్ కాదు. పిల్లల్ని కనేముందు వాళ్లకు ఓ మంచి, సురక్షితమైన వాతావరణాన్ని ఇవ్వగలమా లేదా అన్నది ఆలోచించుకోవాలి. నా ఒపీనియన్ అదే తప్ప.. పెళ్లి చేసుకోకూడదని నేను ఎప్పుడూ అనలేదు” అని కుండబద్దలు కొట్టారు. దీనిపై నరేష్ కూడా స్పందిస్తూ.. ప్రపంచవ్యాప్తంగా జనాభా తగ్గిపోతుండటం, లివ్-ఇన్ రిలేషన్లు ఎక్కువవుతున్న నేపథ్యంలోనే పెళ్లి చేసుకున్నా, లివ్-ఇన్‌లో ఉన్నా పిల్లల్ని కని సృష్టిని ముందుకు తీసుకెళ్లాలనే ఉద్దేశంతోనే తాను మాట్లాడానని, తన మాటల్లో ఏమైనా తప్పుంటే క్షమించాలని పేర్కొన్నారు. మొత్తానికి అనుపమ ఇచ్చిన ఈ వివరణతో నెట్టింట నడుస్తున్న పెళ్లి వివాదానికి తెరపడింది.