ఇటీవల కాలంలో టాలీవుడ్లో రూటెడ్, రస్టిక్ స్టోరీలకు విపరీతమైన ఆదరణ దక్కుతోంది. ఇదే కోవలో వస్తున్న మరో పక్కా విలేజ్ రా అండ్ రస్టిక్ యాక్షన్ డ్రామా ‘అనకాపల్లి’. విక్రమ్ సహిదేవ్, సంధ్యా వశిష్ట, తారక్ పొన్నప్ప ప్రధాన పాత్రల్లో నటించిన ఈ చిత్రానికి ఖగేష్ తమ్మినేని దర్శకుడు. ప్రముఖ దర్శకుడు త్రినాథరావు నక్కిన కథ, స్క్రీన్ ప్లే అందించడమే కాకుండా ఇందులో ఓ కీలక పాత్రలో నటిస్తూ స్వయంగా ఈ చిత్రాన్ని నిర్మించడం విశేషం. అక్టోబర్ 2న గ్రాండ్ గా రిలీజ్ కాబోతున్న ఈ చిత్రం కోసం ఆదివారం హైదరాబాద్ లో నిర్వహించిన ప్రీ రిలీజ్ ఈవెంట్ లో టాలీవుడ్ ప్రముఖులు చేసిన కామెంట్స్ ఇప్పుడు ఇండస్ట్రీలో సంచలనంగా మారాయి.
ఈ ఈవెంట్ కు ముఖ్య అతిథిగా హాజరైన దర్శకుడు శివ నిర్వాణ ‘అనకాపల్లి’ గురించి ఇంట్రెస్టింగ్ సీక్రెట్ లీక్ చేశారు. అనకాపల్లితో తనకు ప్రత్యేకమైన అనుబంధం ఉందని, అక్కడే తాను డిగ్రీ చదివానని ఆయన గుర్తుచేసుకున్నారు. ఆ అనకాపల్లి రూటెడ్ ఎమోషన్ తో తానూ ఓ కథ రాసి సినిమా తీయాలని ఎప్పటినుంచో అనుకున్నానని ఆయన వెల్లడించారు. “కానీ త్రినాథ్ నాకా అవకాశం ఇవ్వలేదు. నాకంటే ముందే ఆయన ఈ ‘అనకాపల్లి’ చిత్రంతో ప్రయోగం చేసేశారు” అని శివ నిర్వాణ చెప్పడంతో సినిమాలో కంటెంట్ ఏ రేంజ్ లో ఉందో అర్థమవుతోంది.
నిర్మాత లగడపాటి శ్రీధర్ సినిమా కోర్ పాయింట్ గురించి మాట్లాడుతూ ఆసక్తికర వ్యాఖ్యలు చేశారు. “ప్రేమ ఎంత మధురం.. ప్రియురాలు అంత కఠినం అనే లైన్ గుర్తుపెట్టుకోండి. ప్రియుడు వయలెంట్ గా మారితే ఎలా ఉంటుందో ఈ చిత్రంలో అద్భుతంగా చూపించారు” అని అన్నారు. మొత్తానికి.. భవ్య శ్రీ మూవీ మేకర్స్, నక్కిన నెరేటివ్స్ బ్యానర్లపై కాండ్రేగుల నాయుడు, త్రినాథరావు నక్కిన నిర్మించిన ఈ చిత్రం అక్టోబర్ 2న రెండు తెలుగు రాష్ట్రాల్లో గట్టిగా సౌండ్ చేయడం ఖాయమని సినీ వర్గాలు భావిస్తున్నాయి. ‘భగీరథ’ సినిమా చూసి స్పూర్తి పొంది ఇవాళ నిర్మాత స్థాయికి ఎదిగిన కాండ్రేగుల నాయుడు ప్రయాణం ఈ వేదికపై అందరికీ స్ఫూర్తినిచ్చింది. దేవ్జండ్ మ్యూజిక్, మాయా వి సినిమాటోగ్రఫీతో రాబోతున్న ఈ కల్ట్ స్టోరీ బాక్సాఫీస్ వద్ద ఎలాంటి సెన్సేషన్ క్రియేట్ చేస్తుందో వేచి చూడాలి.