Amrutha Chowdary : టాలీవుడ్లోకి మరో టాలెంటెడ్ బ్యూటీ

టాలీవుడ్‌లో సినిమా నేపథ్యం లేని కుటుంబం నుంచి వచ్చి హీరోయిన్‌గా రాణించడం అంటే మామూలు సాహసం కాదు. కానీ, ఆ కలనే నిజం చేసుకునేందుకు ఉక్కు సంకల్పంతో అడుగులు వేస్తోంది అమృత చౌదరి. ఏమాత్రం సినీ బ్యాక్‌గ్రౌండ్ లేకపోయినా, కేవలం నటనపై ఉన్న మక్కువతో పరిశ్రమలోకి అడుగుపెట్టిన ఈ తెలుగు అమ్మాయి.. ఇప్పుడు రాజ్ తరుణ్ సరసన హీరోయిన్ గా నటిస్తోంది. అమృతకి చిన్న వయసు నుంచే నటనపై విపరీతమైన ఆసక్తి ఉండేది. సరిగ్గా 16 ఏళ్ల వయసులోనే టిక్‌టాక్ వీడియోల ద్వారా తన క్రియేటివ్ జర్నీని ప్రారంభించింది. సోషల్ మీడియా వేదికగా తనలోని అభినయాన్ని ప్రదర్శిస్తూ నెటిజన్లను ఆకట్టుకున్న ఆమె, అదే పట్టుదలతో నేడు సిల్వర్ స్క్రీన్‌పై అవకాశాలను దక్కించుకుంటోంది. చిన్నచిన్న సపోర్టింగ్ పాత్రలతో సరిపెట్టుకోకుండా, నేరుగా హీరోయిన్‌గా గుర్తింపు తెచ్చుకోవాలన్నదే తన లక్ష్యం అని చెబుతోంది.

ఒకవైపు మెకానికల్ ఇంజినీరింగ్ చదువుతూనే, మరోవైపు సినిమాలపై తన ప్యాషన్‌ను బ్యాలెన్స్ చేస్తోంది. ప్రస్తుతం రాజ్ తరుణ్ హీరోగా నటిస్తున్న ‘టార్టాయిస్’ చిత్రంలో హీరోయిన్‌గా నటిస్తోన్న అమృత.. ఓ తమిళ చిత్రంలోనూ ఛాన్స్ కొట్టేసింది. ఇటీవల జరిగిన ‘టార్టాయిస్’ సాంగ్ లాంఛ్ ఈవెంట్‌లో ఆమె నటనకు ఊహించని ప్రశంసలు దక్కాయి. సీనియర్ నటుడు అవసరాల శ్రీనివాస్ తో పాటు మ్యూజిక్ డైరెక్టర్ అనూప్ రూబెన్స్ సైతం ఈ సినిమాలో అమృత పెర్ఫార్మెన్స్ గురించి ప్రత్యేకంగా ప్రస్తావించడం విశేషం.