Akshara Haasan: “టెన్త్‌లో 3 సార్లు ఫెయిల్.. చదువు ఆపేశా”.. కమల్ హాసన్ కూతురి షాకింగ్ కామెంట్స్!

Akshara Haasan: స్టార్ హీరోల వారసులు అంటే పుట్టుకతోనే వెండితెర అవకాశాలు, సులువైన విజయాలు ఉంటాయని అంతా అనుకుంటారు. కానీ ఆ అంచనాలు అందరి విషయంలో నిజం కావని నిరూపిస్తున్నారు లోకనాయకుడు కమల్ హాసన్ చిన్న కుమార్తె, నటి అక్షర హాసన్. సినీ నేపథ్యం ఉన్న కుటుంబంలో పుట్టినంత మాత్రాన ప్రయాణం పూలబాటలా ఉండదని స్పష్టం చేస్తూ, తాజాగా ఓ పాడ్‌కాస్ట్‌లో తన చదువు, అపజయాలు, కెరీర్ ఎదుగుదలపై ఎవరూ ఊహించని షాకింగ్ నిజాలను నిర్మొహమాటంగా పంచుకున్నారు. ఈ సందర్భంగా ఆమె మాట్లాడుతూ.. చదువు విషయంలో తాను ఎదుర్కొన్న ఫెయిల్యూర్స్‌ను ఏమాత్రం దాచకుండా అక్షర ఓపెన్‌గా వెల్లడించారు. హైస్కూల్ చదువుల్లో తాను తీవ్రంగా వెనుకబడ్డానని, పదో తరగతి పరీక్షల్లో ఏకంగా మూడుసార్లు ఫెయిలయ్యానని చెప్పారు. వరుసగా మూడేళ్లు తప్పడంతో చదువుపై ఆసక్తి పూర్తిగా పోయిందని, ఇక పరీక్షలు పాస్ కావడం తనవల్ల కాదని గ్రహించి చదువుకు శాశ్వతంగా స్వస్తి పలికినట్లు చెప్పారు. అయితే ఇలాంటి క్లిష్ట పరిస్థితుల్లోనూ తల్లిదండ్రులు కమల్ హాసన్, సారిక తనపై ఎలాంటి ఒత్తిడి తీసుకురాలేదని, నచ్చిన రంగంలో రాణించే స్వేచ్ఛను ఇచ్చారని కృతజ్ఞతతో గుర్తుచేసుకున్నారు.

స్టార్ కిడ్స్ అయినా ఇంట్లో ప్రశంసల కంటే విమర్శలే సూటిగా ఉంటాయని అక్షర చెప్పుకొచ్చారు. తెరపై తన నటన బాగోలేకపోతే తల్లిదండ్రులు మొహం మీదే నిక్కచ్చిగా మాట్లాడతారని, “చాలా చెత్తగా నటించావు” అని నిర్మొహమాటంగా చెబుతారని వెల్లడించారు. ఆ నిజాన్ని అంగీకరించి తప్పుల నుంచి పాఠాలు నేర్చుకునే వాతావరణం ఇంట్లో ఉండటం వల్లే తాను గ్రౌండెడ్‌గా ఉండగలుగుతున్నానని పేర్కొన్నారు. చాలామంది స్టార్ కిడ్స్ లాగా అక్షర నేరుగా హీరోయిన్‌గా మారలేదు. ఫస్ట్ డ్యాన్స్ కొరియోగ్రాఫర్‌గా తన ప్రయాణాన్ని స్టార్ట్ చేసి, మ్యూజిక్ వీడియోలకు పనిచేశారు. ఆ తర్వాత రాహుల్ ధోలాకియా చిత్రం ‘సొసైటీ’, కమల్ హాసన్ ‘శభాష్ నాయుడు’ ప్రాజెక్టులకు అసిస్టెంట్ డైరెక్టర్‌గా పనిచేసి కెమెరా వెనుక కష్టాన్ని అనుభవించారు. అమితాబ్ బచ్చన్, ధనుష్ నటించిన ‘షమితాభ్’తో అనూహ్యంగా హీరోయిన్‌గా పరిచయమై, ఆ తర్వాత అజిత్‌‌తో ‘వివేగం’, ఇటీవల ‘సిమ్యులాక్రా’ చిత్రాల్లో నటించినప్పటికీ.. తన అసలు కల మాత్రం దర్శకత్వమేనని స్పష్టం చేశారు. ఇప్పటికే తన సోదరి శృతి హాసన్ స్టార్ హీరోయిన్‌గా రాణిస్తున్న సంగతి తెలిసిందే. అయితే తాను మాత్రం భవిష్యత్తులో నటన కంటే పూర్తిస్థాయి దర్శకురాలిగా మెగాఫోన్ పట్టి సరికొత్త కథలతో రాబోతున్నట్లు అక్షర హాసన్ ప్రకటించారు.