Aamir Khan: సోనమ్ వాంగ్‌చుక్ జీవితం ఆధారంగా ‘3 ఇడియట్స్’ సినిమా.. క్లారిటీ ఇచ్చిన ఆమిర్ ఖాన్

బాలీవుడ్ స్టార్ హీరో ఆమిర్ ఖాన్ నటించిన సూపర్‌హిట్ చిత్రం ‘3 ఇడియట్స్’ గురించి చాలా కాలంగా ఒక ప్రచారం కొనసాగుతోంది. సినిమాలోని రణ్‌ఛో ‘ఫున్‌సుఖ్ వాంగ్డు’ పాత్ర సామాజిక కార్యకర్త, విద్యావేత్త సోనమ్ వాంగ్‌చుక్ జీవితాన్ని ఆధారంగా చేసుకుని రూపొందించారనే అభిప్రాయం చాలామందిలో ఉంది. అయితే, ఈ ప్రచారానికి తాజాగా ఆమిర్ ఖాన్ పూర్తిగా తెరదించారు.

సోనమ్ వాంగ్‌చుక్‌తో సంబంధం లేదు

గురువారం లండన్‌లో జరిగిన ‘లగాన్’ ప్రత్యేక ప్రీమియర్ సందర్భంగా మీడియాతో మాట్లాడిన ఆమిర్ ఖాన్, ‘3 ఇడియట్స్’ సినిమా సోనమ్ వాంగ్‌చుక్ స్ఫూర్తితో రూపొందిందనే వార్తలను ఖండించారు. ఆయన మాట్లాడుతూ… “అది నిజం కాదు. అది పూర్తిగా ఒక అపార్థం. మేము ‘3 ఇడియట్స్’ సినిమా షూటింగ్ చేస్తున్న సమయంలో నాకు సోనమ్ వాంగ్‌చుక్ గురించి అసలు తెలియదు. తర్వాత ఒక వీడియోలో ఓమీ వైద్య (చతుర్ పాత్రధారి) అలా చెప్పడం చూశాను. కానీ అది సరైన సమాచారం కాదు.” అని స్పష్టం చేశారు.

రచయితలకు కూడా తెలియదన్న ఆమిర్

ఈ సందర్భంగా దర్శకుడు రాజ్‌కుమార్ హిరానీ, రచయిత అభిజాత్ జోషి పేర్లను ప్రస్తావించిన ఆమిర్ ఖాన్, సినిమా బృందంలో ఎవరికీ అప్పట్లో సోనమ్ వాంగ్‌చుక్ గురించి తెలియదని చెప్పారు. “రాజ్‌కుమార్ హిరానీకి, అభిజాత్ జోషికి లేదా మాలో ఎవరికీ అప్పట్లో సోనమ్ వాంగ్‌చుక్ గురించి తెలియదు. ఆయన చేస్తున్న పని గొప్పది. దాన్ని మెచ్చుకోవడానికి ‘3 ఇడియట్స్’లోని పాత్ర ఆధారంగా ఉండాల్సిన అవసరం లేదు. నేను కేవలం వాస్తవాలను మాత్రమే చెబుతున్నాను.” అని ఆమిర్ పేర్కొన్నారు.

సోనమ్ వాంగ్‌చుక్ ఆరోగ్యంపై ఆందోళన

ప్రస్తుతం ఢిల్లీలోని జంతర్ మంతర్ వద్ద నిరాహార దీక్ష చేస్తున్న సోనమ్ వాంగ్‌చుక్ ఆరోగ్యం గురించి కూడా ఆమిర్ ఖాన్ స్పందించారు. “ఆయన ఆరోగ్యం, ప్రాణం గురించి మేమంతా ఆందోళన చెందుతున్నాం. అన్నీ బాగానే జరుగుతాయని ఆశిస్తున్నాం. ఆయన దీక్షను విరమించి ఆరోగ్యంగా ఉండాలని కోరుకుంటున్నాం.” అని చెప్పారు.

ఓమీ వైద్య వ్యాఖ్యలతో మళ్లీ చర్చ

కొద్ది రోజుల క్రితం ‘3 ఇడియట్స్’లో చతుర్ రామలింగం పాత్ర పోషించిన నటుడు ఓమీ వైద్య ఒక వీడియో విడుదల చేశారు. అందులో సోనమ్ వాంగ్‌చుక్‌కు మద్దతు తెలుపుతూ, సినిమాలో ఆమిర్ ఖాన్ పోషించిన ఫున్‌సుఖ్ వాంగ్డు పాత్ర ఆయనను స్ఫూర్తిగా తీసుకుని రూపొందించారని పేర్కొన్నారు. దీంతో ఈ అంశం మరోసారి చర్చనీయాంశమైంది. అయితే ఇప్పుడు ఆమిర్ ఖాన్ స్వయంగా స్పందిస్తూ, ‘3 ఇడియట్స్’ సినిమా సోనమ్ వాంగ్‌చుక్ జీవితకథ ఆధారంగా రూపొందలేదని, అది కేవలం అపోహ మాత్రమేనని స్పష్టం చేశారు.