Ranga Marthanda: బ్రహ్మానందంకు ‘చిరు’ సత్కారం!

Brahmanandam: క్రియేటివ్ డైరెక్టర్ కృష్ణవంశీ తెరకెక్కించిన ‘రంగమార్తాండ’ సినిమా ఉగాది కానుకగా బుధవారం జనం ముందుకు వచ్చింది. మరాఠీ చిత్రం ‘నటసమ్రాట్’కు రీమేక్ అయిన ఈ సినిమాలో టైటిల్ రోల్ ను ప్రకాశ్ రాజ్ పోషించగా, ఆయన ఆప్త మిత్రుడు చక్రపాణి పాత్రను బ్రహ్మానందం చేశారు. వేయికి పైగా చిత్రాలలో వినోదాన్ని పండించిన బ్రహ్మానందం తన ఇమేజ్ కు పూర్తి భిన్నంగా ఇందులో కరుణ రసాన్ని అద్భుతంగా పోషించారంటూ విమర్శకులు సైతం ప్రశంసల జల్లులు కురిపిస్తున్నారు. ఇందులో నటించిన ప్రధాన పాత్రధారులందరూ ఒక ఎత్తు అయితే… బ్రహ్మానందం మరో ఎత్తు అని, ఆయన ఏటికి ఎదురీది ప్రేక్షకుల కళ్ళలో నీళ్ళు తెప్పించారని అంటున్నారు. ఇదిలా ఉంటే… ‘రంగమార్తండ’ సినిమా కోసం లక్ష్మీ భూపాల రాసిన షాయరీని చిరంజీవి పాడారు. అలానే బ్రహ్మానందం పాత్రకు లభిస్తున్న ప్రశంసల పట్ల చిరంజీవి సైతం హర్షం వ్యక్తం చేస్తున్నారు. బ్రహ్మానందం కెరీర్ ప్రారంభ రోజులలో చిరంజీవి ఆయన్ని ఎంతో ప్రోత్సహించారు. ఇవాళ నటుడిగా బ్రహ్మానందంలోని మరో కోణాన్ని చూసిన ఆయన ప్రత్యేకంగా అభినందించారు. తన తనయుడు రామ్ చరణ్ తో కలిసి చిరంజీవి బ్రహ్మానందాన్ని ప్రత్యేకంగా శాలువతో సత్కరించి, అభినందించారు. దానికి సంబంధించిన ఫోటో సోషల్ మీడియాలో చక్కర్లు కొడుతోంది.