నిద్ర లేచింది ‘పురుష లోకం’.. సమంత సాంగ్ పై కేసు

ఐకాన్ స్టార్ అల్లు అర్జున్ నటించిన ‘పుష్ప’ ఈ శుక్రవారం డిసెంబరు 17న పలు సౌత్ ఇండియన్ భాషల్లో విడుదల కానుంది. ఈ చిత్రానికి సంబంధించిన ప్రమోషన్స్ ఇప్పటికే ప్రారంభమయ్యాయి. నిన్న సినిమా ప్రీ రిలీజ్ ఈవెంట్ జరగగా, దర్శక ధీరుడు రాజమౌళి, కొరటాల, మారుతీ, వెంకీ కుడుముల వంటి దర్శకులు ముఖ్య అతిథులుగా హాజరయ్యారు. కాగా అంతకన్నా ముందే విడుదల చేసిన సమంత స్పెషల్ ఐటెం సాంగ్ “ఊ అంటావా మావా ఉఊ అంటావా” సౌత్ లో టాప్ లేపేస్తోంది. కానీ మరో వర్గం మాత్రం ఈ సాంగ్ లోని లిరిక్స్ పై ఆగ్రహం వ్యక్తం చేస్తున్నారు. సమంత చేసిన ఈ సాంగ్ పై, అందులో లిరిక్స్ పురుషులను కించపరిచేలా ఉన్నాయంటూ అభ్యంతరం వ్యక్తం చేస్తున్నారు.

Read Also : బన్నీ, కొరటాల కాంబోలో భారీ ప్రాజెక్ట్… ‘పుష్ప’ కంటే ఎక్కువ !

ఇంతకుముందు మహేష్ బాబు ‘వన్ నేనొక్కడినే” సినిమాలో ఓ సన్నివేశం అభ్యంతరకరంగా ఉందంటూ కామెంట్స్ చేసిన సమంత… ఇప్పుడు పురుషులను కించపరిచేలా ఉన్న ఈ సాంగ్ లో ఎలా చేసింది ? అంటూ ప్రశ్నిస్తున్నారు. ఈ మేరకు మెన్స్ అసోసియేషన్ అంటూ కొంతమంది కేసు కూడా నమోదు చేశారని నేషనల్ మీడియాలో ప్రచారం జరుగుతోంది. అల్లు అర్జున్ మొదటి పాన్ ఇండియా మూవీ విడుదలకు ముందే వివాదంలో చిక్కుకోవడంతో సినీ ఇండస్ట్రీలో సంచలనంగా మారింది. దేవి శ్రీ ప్రసాద్ స్వరపరిచిన ఐటెం సాంగ్ కోసం సమంత ప్రత్యేకంగా కనిపించింది. తమిళంలో వివేక, తెలుగులో చంద్రబోస్ ఈ సాంగ్ కు లిరిక్స్ రాశారు.

కాగా సుకుమార్ దర్శకత్వంలో అల్లు అర్జున్, రష్మిక మందన్న ప్రధాన పాత్రలు పోషించిన ‘పుష్ప’ చిత్రం రెండు భాగాలుగా విడుదల కానుంది. ముత్తంశెట్టి మీడియాతో కలిసి మైత్రి మూవీ మేకర్స్ నిర్మించిన ఈ చిత్రం తమిళం, తెలుగు, మలయాళం, కన్నడ, హిందీ భాషల్లో విడుదల కానుంది.