ట్రైలర్ టాక్: చిన బంగార్రాజు చిలిపి చేష్టలకు మురిసిపోతున్న’బంగార్రాజు’

అక్కినేని నాగార్జున, నాగ చైతన్య మల్టీస్టారర్ గా తెరకెక్కిన చిత్రం బంగార్రాజు. కళ్యాణ్ కృష్ణ దర్శకత్వంలో తెరకెక్కిన ఈ సినిమా సంక్రాంతి కానుకగా జనవరి 14 న విడుదలకు సిద్ధమవుతోంది. ఇప్పటికే ఈ సినిమా నుంచి విడుదలైన సాంగ్స్, టీజర్ ప్రేక్షకులను విశేషంగా ఆకట్టుకొంటున్నాయి. ఇక తాజాగా ఈ మూవీ నుంచి ట్రైలర్ ని మేకర్స్ రిలీజ్ చేశారు. సంక్రాంతి అంటే.. ముగ్గులు, సందళ్ళు, పేకాటలు, కొత్త అల్లుళ్ళు అన్నట్లుగా అన్ని ఈ ట్రైలర్ లో దించేశారు మేకర్స్.. ట్రైలర్ ఆద్యంతం ఆకట్టుకొంటోంది.

ఇక ట్రైలర్ విషయానికొస్తే.. బంగార్రాజు నరకంలో కూడా అమ్మాయిలతో సరసాలు ఆడుతూ కనిపిస్తాడు. ఇక అచ్చు గుద్దినట్లు తాత బుద్దులతో పుట్టిన చిన బంగార్రాజు కూడా ఊర్లో ఏ అమ్మాయిని వదలకుండా సరసాలు ఆడుతూ కనిపిస్తాడు. ఇంతలో తన చదువు, తెలివితేటలతోనే సర్పంచ్ గా అయ్యాయని చెప్పుకుతిరిగే నాగలక్ష్మి ప్రేమలో పడిపోతాడు చిన బంగార్రాజు. ఇక మనవడికి వచ్చిన సమస్యను తీర్చడానికి బంగార్రాజు భూలోకం వచ్చినట్లు చూపించారు. ఈసారి రమ్యకృష్ణ కూడా ఆత్మగా కనిపించింది. మనవడికి వచ్చిన సమస్య ఏంటి.. ఆ సమస్యకు ఆ వురి దేవాలయానికి ఉన్న సంబంధం ఏంటి.. ఆ లయకారుడు ఆజ్ఞ ఎలా ఉంది..?చివరికి చిన బంగార్రాజు లైఫ్ ని బంగార్రాజు సెట్ చేశాడా..? లేదా..? అనేది సినిమా చూసి తెలుసుకోవాలి. చిన బంగార్రాజు గా నాగ చైతన్య లుక్ అదిరిపోయింది. దసరా బుల్లోడు లాగా పూల పూల చొక్కాలు.. మెడలో పులిగోరు చైన్ తో ఆకట్టుకున్నాడు. ఇక నాగార్జున ఎప్పటిలానే తెల్ల పంచెకట్టులోనే కనిపించాడు. నాగలక్ష్మిగా కృతి శెట్టి ఆకట్టుకొంది. ట్రైలర్ కి అనూప్ సంగీతం హైలైట్ గా నిలిచింది. వెరసి బంగార్రాజు ట్రైలర్.. సోషల్ ఫాంటసీ అంశాలతో రొమాంటిక్ ఫ్యామిలీ ఎంటర్టైనర్ గా తెరకెక్కినట్లు కనిపిస్తోంది. మరి ఈ సివినిమ సంక్రాంతి హిట్ గా నిలుస్తుందో లేదో చూడాలి.