Babu Mohan Reveals He Is Acting in 15 Movies: ప్రముఖ సినీ నటుడు, మాజీ మంత్రి బాబు మోహన్ తిరుమలలో శ్రీ వేంకటేశ్వర స్వామివారిని దర్శించుకున్నారు. ఈరోజు ఉదయం వీఐపీ బ్రేక్ సమయంలో శ్రీవారిని దార్చుకుని.. ప్రత్యేక పూజలు నిర్వహించారు. దర్శనం అనంతరం ఆలయ అధికారులు ఆయనకు తీర్థప్రసాదాలు అందజేసి స్వామివారి ఆశీర్వచనాలను అందించారు. ఈ సందర్భంగా మీడియాతో మాట్లాడిన బాబు మోహన్.. తన సినీ జీవితానికి సంబంధించిన పలు ఆసక్తికర విషయాలను వెల్లడించారు.
ప్రస్తుతం తాను 15 సినిమాల్లో నటిస్తున్నానని బాబు మోహన్ తెలిపారు. ‘ఇప్పుడు నేను 15 సినిమాల్లో నటిస్తున్నా. అందులో 8 సినిమాలు విడుదలకు సిద్ధంగా ఉన్నాయి. ఈ సినిమాల్లో కనీసం ఐదు చిత్రాలు ప్రేక్షకులను తప్పకుండా అలరిస్తాయి. ఆ నమ్మకం నాకుంది. కథలకు ప్రాధాన్యత ఉన్న, గౌరవప్రదమైన పాత్రలు రావడం నాకు ఎంతో ఆనందంగా ఉంది’ అని బాబు మోహన్ చెప్పారు. ఇటీవలి కాలంలో తనకు మంచి పాత్రలు వస్తున్నాయని పేర్కొన్న బాబు మోహన్.. దర్శకుడు కృష్ణారెడ్డి తెరకెక్కిస్తున్న సినిమాలో డ్యాన్స్లు కూడా చేశానని చెప్పారు. వయసు పెరిగినా ప్రేక్షకులను అలరించేలా శక్తివంచన లేకుండా నటిస్తున్నానని ఆయన తెలిపారు.
సినీ పరిశ్రమలో తన ప్రయాణం 41 సంవత్సరాలు పూర్తయ్యిందని బాబు మోహన్ గుర్తు చేసుకున్నారు. చిన్నప్పటి నుంచి నటన అంటే తనకు అపారమైన ప్రేమ అని చెప్పారు. ‘చిన్నప్పటి నుంచి నటన అంటే ఇష్టం. నా ఆఖరి శ్వాస వరకు నటిస్తూనే ఉంటాను. ప్రేక్షకుల ఆదరణే నాకు అతిపెద్ద బలం. అభిమానుల ప్రేమ, ఆశీర్వాదాలతోనే ఇంతకాలం సినీ ప్రయాణాన్ని విజయవంతంగా కొనసాగించగలిగా’ అని బాబు మోహన్ భావోద్వేగం చెందారు.