Meena Sagar: టాలీవుడ్ సీనియర్ నటి మీనా ఇటీవలే తన భర్తను పోగొట్టుకున్న విషయం విదితమే. ఊపిరితిత్తుల సమస్య తో మీనా భర్త విద్యాసాగర్ ఇటీవలే మృతి చెందాడు. భర్తను కాపాడుకోవడానికి ఆమె ఎంతగానో పోరాటం చేసినా.. ఫలితం దక్కలేదు. ఇక భర్త మరణంతో మీనా కృంగిపోకుండా.. బిడ్డకోసం మళ్లీ నార్మల్ అవ్వడానికి ప్రయత్నిస్తోంది. ఇటీవలే ఆమె తన సినిమా షూటింగ్లను మొదలుపెట్టింది. ఇక తెలుగులో ప్రస్తుతం ఎస్వీ కృష్ణా రెడ్డి దర్శకత్వంలో తెరకెక్కుతున్న ‘ఆర్గానిక్ మామ హైబ్రీడ్ అల్లుడు’ చిత్రంలో మీనా ఒక కీలక పాత్రలో నటిస్తోంది. ఈ సినిమాను కమెడియన్ ఆలీ నిర్మిస్తుండడం విశేషం.
ఇక జూలై 19 న రాజేంద్ర ప్రసాద్ బర్త్ డే కావడంతో ఆలీ భార్య జుబేదా తన యూట్యూబ్ కోసం ఒక వీడియో తీయగా.. అందులో మీనా కనిపించింది. తన అభిమాన నటిని కలుసుకున్నందుకు సంతోషంగా ఉందన్న జుబేదా, మీనాతో కొద్దిసేపు ముచ్చటించింది. తెలుగు సినిమాలు ఎందుకు చేయడం లేదని ప్రశ్నించగా.. అందరూ ఇదే అడుగుతున్నారని, ఇక నుంచి తెలుగు సినిమాల్లో కూడా కనిపిస్తానని చెప్పుకొచ్చింది. అంతేకాకుండా తన కెరీర్ లో ఎస్వీ కృష్ణా రెడ్డి దర్శకత్వంలో ఒక్క సినిమా కూడా చేయలేదని, ఆ అవకాశం ఇప్పుడు వచ్చినందుకు ఆనందంగా ఉందని తెలిపింది. ప్రస్తుతం ఈ వీడియో యూట్యూబ్ లో వైరల్ గా మారింది.