How To Clean Tiles Lining: ఇంట్లోని ఫ్లోర్ ఎంత మెరిసిపోతున్నా.. టైల్స్ మధ్యలో ఉండే గ్యాప్స్ (లైన్స్) నల్లగా మారిపోతే మాత్రం ఇల్లు మొత్తం మురికిగా కనిపిస్తుంది. ముఖ్యంగా వంటగది, బాత్రూమ్‌లలో ఈ సమస్య ఎక్కువగా ఉంటుంది. రోజూ ఊడ్చి, తుడుచుకున్నా ఆ లైన్లలో పేరుకుపోయే నల్లటి మురికి అంత సులభంగా వదలదు. దీంతో చాలామంది ఖరీదైన క్లీనర్లు కొనుగోలు చేయడం లేదా టైల్స్‌ను గట్టిగా రుద్దడం చేస్తుంటారు. దీనివల్ల శ్రమ ఎక్కువ కావడంతో పాటు టైల్స్ దెబ్బతినే ప్రమాదం ఉంది. అయితే, దీనికోసం పెద్దగా ఖర్చు చేయాల్సిన పనిలేదు. ఇంట్లోని వస్తువులతోనే ఈ సమస్యను చాలా సులభంగా పరిష్కరించుకోవచ్చు.
టైల్స్ మధ్యలో ఈ నల్లటి మురికి ఎందుకు చేరుతుంది?
టైల్స్ పైభాగం నునుపుగా ఉండటం వల్ల దుమ్ము, ధూళి సులభంగా తుడిచిపోతాయి. కానీ, టైల్స్ మధ్యలో ఉండే సిమెంట్ భాగం కాలక్రమేణా దుమ్ము, తడిని పీల్చుకుంటుంది. అందుకే ఆ ప్రాంతంలో క్రమంగా మురికి పేరుకుపోతుంది. వంటగదిలో వంట చేసేటప్పుడు నూనె జిడ్డు, ఆవిరి ఆ లైన్లపై పడతాయి. ఇక బాత్రూమ్‌లో అయితే నీరు నిలవడం వల్ల తేమ ఉండి, మురికితో పాటు ఫంగస్ కూడా తయారవుతుంది. దీనివల్ల తెల్లగా లేదా లేత రంగులో ఉండాల్సిన ఆ లైన్లు నల్లగా మారి ఇల్లు పాతదానిలా కనిపిస్తుంది.
టైల్స్ మధ్య ఉన్న నల్లటి పొరను ఎలా వదిలించాలి?
ముందుగా ఒక చిన్న గిన్నెలో బేకింగ్ సోడా తీసుకుని, అందులో కొద్దికొద్దిగా నీరు కలుపుతూ చిక్కటి పేస్ట్ లా తయారు చేసుకోవాలి. ఆ పేస్ట్ టైల్స్ మధ్యలో సులభంగా పట్టేలా ఉండాలి. ఇప్పుడు ఈ పేస్ట్‌ను టైల్స్ మధ్య నల్లగా మారిన ప్రదేశంలో రాయాలి. మురికి వదిలిపోవడానికి దీన్ని కొన్ని నిమిషాల పాటు అలాగే ఉంచాలి. ఆ తర్వాత పాత టూత్‌బ్రష్ లేదా మెత్తటి బ్రష్‌తో ఆ లైన్లను మెల్లగా రుద్దాలి. ఎక్కువ బలప్రయోగం చేయడం లేదా ఇనుప స్క్రాపర్లు వాడకూడదు. అలా చేస్తే మధ్యలో ఉండే సిమెంట్ ఊడిపోయే ప్రమాదం ఉంది. బ్రష్‌తో శుభ్రం చేశాక తడి గుడ్డతో ఆ పేస్ట్‌ను, మురికిని తుడిచేయాలి. ఆ తర్వాత మంచి నీళ్లతో శుభ్రంగా కడిగి, పొడి గుడ్డతో తుడవాలి. ముఖ్యంగా బాత్రూమ్‌లో నీరు నిలవకుండా చూసుకోవాలి. ఎందుకంటే తేమ ఉంటే మళ్లీ ఫంగస్ చేరే అవకాశం ఉంటుంది. ఇక, బేకింగ్ సోడా, వెనిగర్ కలిపితే నురుగు వస్తుంది కానీ దానివల్ల శుభ్రం కావడం అనేది అంతగా జరగకపోవచ్చు. పైగా వెనిగర్, నిమ్మరసం మార్బుల్స్ లాంటి సహజమైన రాళ్లను, సిమెంట్ బంధాన్ని దెబ్బతీస్తాయి. అలాగే బ్లీచ్‌ను ఎప్పుడూ కూడా వెనిగర్, నిమ్మరసం లేదా ఇతర క్లీనర్లతో కలపకూడదు. అలా చేస్తే ప్రమాదకరమైన వాయువులు వెలువడతాయి. టైల్స్ మధ్య మురికి పేరుకోకుండా ఉండాలంటే వంటగదిలో నూనె పడిన చోటు వెంటనే తుడిచేయాలి. బాత్రూమ్‌లో నీరు నిలవకుండా చూసుకోవాలి. వారానికి ఒకసారి మెత్తటి బ్రష్‌తో ఆ లైన్లను శుభ్రం చేసుకోవాలి. ఒకవేళ నల్లటి మచ్చలు లేదా ఫంగస్ పోకపోతే అప్పుడు మార్కెట్లో దొరికే క్లీనర్లను వాడుకోవచ్చు.