Egg Storage Tips in Summer: వేసవిలో గుడ్లు ఎన్ని రోజులు నిల్వ ఉంటాయి..? తినే ముందు తప్పక తెలుసుకోవాల్సిన విషయాలు

Egg Storage Tips in Summer: వేసవి కాలంలో ఆహార పదార్థాల విషయంలో ప్రత్యేక జాగ్రత్తలు తీసుకోవడం చాలా అవసరం. ముఖ్యంగా గుడ్ల వంటి సున్నితమైన ఆహార పదార్థాలను సరైన విధంగా నిల్వ చేయకపోతే అవి త్వరగా పాడై ఆరోగ్యానికి ప్రమాదంగా మారే అవకాశం ఉంటుంది. చాలామంది మార్కెట్‌ నుంచి గుడ్లు కొనుగోలు చేసి వంటగదిలో బయటే ఉంచేస్తుంటారు. అయితే మండుటెండల్లో ఇలా చేయడం ప్రమాదకరమని నిపుణులు హెచ్చరిస్తున్నారు. వేసవిలో ఉష్ణోగ్రతలు 35 నుంచి 40 డిగ్రీల సెల్సియస్ దాటినప్పుడు గుడ్లు చాలా వేగంగా పాడవుతాయి. ముఖ్యంగా గది ఉష్ణోగ్రత వద్ద ఎక్కువసేపు ఉంచితే వాటిలో బ్యాక్టీరియా పెరిగే అవకాశాలు ఎక్కువగా ఉంటాయి. వేడి కారణంగా గుడ్ల లోపల తేమ పెరిగి, సూక్ష్మజీవులు సులభంగా ప్రవేశించి వాటిని తినడానికి పనికిరాకుండా చేస్తాయి.

గుడ్లను ఎక్కడ నిల్వ చేయాలి..?
* అమెరికా వ్యవసాయ శాఖ (USDA) మార్గదర్శకాల ప్రకారం, గుడ్లను ఒకసారి ఫ్రిజ్‌లో ఉంచిన తర్వాత వాటిని రెండు గంటలకంటే ఎక్కువసేపు బయట ఉంచకూడదు.

* వేసవిలో బయట ఉంచిన గుడ్లు కేవలం రెండు నుంచి మూడు రోజుల్లోనే పాడయ్యే ప్రమాదం ఉంది. అందుకే గుడ్లను కొనుగోలు చేసిన వెంటనే చల్లని ప్రదేశంలో నిల్వ చేయాలి.

* వేసవిలో గుడ్లను బయట ఉంచడం వల్ల కలిగే ప్రధాన ప్రమాదం “సాల్మొనెల్లా” అనే బ్యాక్టీరియా పెరగడం. ఈ బ్యాక్టీరియా ఫుడ్ పాయిజనింగ్‌కు ప్రధాన కారణంగా భావిస్తారు. దీని వల్ల వాంతులు, విరేచనాలు, తీవ్రమైన కడుపునొప్పి, జ్వరం వంటి సమస్యలు రావచ్చు.

* చల్లని వాతావరణంలో నిష్క్రియంగా ఉండే ఈ బ్యాక్టీరియా, అధిక వేడి కారణంగా వేగంగా విస్తరిస్తుందని నిపుణులు చెబుతున్నారు.

* గుడ్లను ఎక్కువకాలం తాజాగా ఉంచాలంటే ఫ్రిజ్‌లో నిల్వ చేయడం ఉత్తమ మార్గం.

* 4 డిగ్రీల సెల్సియస్ లేదా అంతకంటే తక్కువ ఉష్ణోగ్రతలో పచ్చి గుడ్లు 3 నుంచి 5 వారాల వరకు తాజాగా ఉంటాయి.

* ఉడకబెట్టిన గుడ్లు అయితే, పెంకుతో సహా ఫ్రిజ్‌లో ఉంచితే సుమారు 7 రోజుల వరకు సురక్షితంగా ఉంటాయి.

అందువల్ల వేసవిలో గుడ్ల నిల్వ విషయంలో నిర్లక్ష్యం చేయకుండా, సరైన ఉష్ణోగ్రతలో భద్రపరిచి మాత్రమే వినియోగించడం మంచిదని వైద్య నిపుణులు సూచిస్తున్నారు.