Ridge Gourd Peel Chutney: బీరకాయ తొక్కతో నోరూరించే పచ్చడి.. ఇలా చేస్తే ప్లేట్ ఖాళీ అవ్వాల్సిందే!

Ridge Gourd Peel Chutney Recipe: సాధారణంగా బీరకాయతో పప్పు, కూర, వేపుడు లేదా టమాటా కాంబినేషన్‌లో వంటకాలు చేసుకుంటుంటాం. అయితే బీరకాయ తొక్కను మాత్రం వ్యర్థంగా పారేస్తుంటారు. నిజానికి బీరకాయ తొక్కులో అత్యధికంగా ఫైబర్ (పీచు పదార్థం), పోషకాలు ఉంటాయి. ఈ తొక్కను వేస్ట్ చేయకుండా నువ్వుల కాంబినేషన్‌తో కారంగా, రుచిగా ఉండే కమ్మని రోటి పచ్చడి ఎలా తయారుచేసుకోవాలో ఇక్కడ చూద్దాం..

కావాల్సిన పదార్థాలు:

* బీరకాయ తొక్కలు: 1 కప్పు (పైన ఉండే ఈనెలు, తొక్క చెక్కి తీసినవి)
* నువ్వుల నూనె: 3 టేబుల్ స్పూన్లు
* పచ్చిమిర్చి: 4
* ఎండుమిర్చి: 4
* శనగపప్పు: 1 స్పూన్
* నువ్వులు: 1-2 స్పూన్లు
* వెల్లుల్లి రెబ్బలు: 5
* టమాటా: 1 (తరిగినది)
* కొత్తిమీర: కొద్దిగా
* చింతపండు: సరిపడా (కొద్దిగా)
* ఉప్పు: రుచికి సరిపడా
* పోపు కోసం: నూనె, ఆవాలు, జీలకర్ర, ఎండుమిర్చి, కరివేపాకు, పసుపు.

తయారీ విధానం:

ముందుగా బీరకాయ చివరలను కట్ చేసి, పైన ఉండే చెక్కు/తొక్కను కత్తితో సులభంగా వేరుచేసి పక్కన పెట్టుకోవాలి. బాణలిలో శుద్ధమైన నువ్వుల నూనె వేసి వేడెక్కనివ్వాలి. అందులో పచ్చిమిర్చి, ఎండుమిర్చి, శెనగపప్పు, వెల్లుల్లి వేసి దోరగా వేయించాలి. ఇవి వేగిన తర్వాత బీరకాయ తొక్కను వేసి పచ్చివాసన పోయేంత వరకు బాగా వేయించాలి. ఆపై నువ్వులు కూడా వేసి కొద్దిసేపు మగ్గనివ్వాలి.

చివరిగా తరిగిన టమాటా, కొత్తిమీర వేసి చిన్న మంటపై టమాటా మెత్తబడే వరకు మగ్గించి, స్టవ్ ఆఫ్ చేసి చల్లారనివ్వాలి. (గమనిక: శెనగపప్పు, నువ్వులు, మిర్చిలను ముందుగా వేయించి పొడి చేసి, ఆ తర్వాత తొక్క-టమాటాలను వేయించి కూడా రుబ్బుకోవచ్చు). ఇప్పుడు మిక్సీ జార్‌లో (లేదా రోట్లో) వేయించిన మిశ్రమం, రుచికి సరిపడా ఉప్పు, నానబెట్టిన చింతపండు వేసి కచ్చాపచ్చాగా నూరుకోవాలి.

ఇప్పుడు కడాయిలో కొద్దిగా నూనె వేసి ఆవాలు, జీలకర్ర, ఎండుమిర్చి, కరివేపాకు, చిటికెడు పసుపు వేసి తాళింపు చేయాలి. ఇందులో నూరుకున్న పచ్చడి వేసి బాగా కలిపి స్టవ్ ఆఫ్ చేస్తే కమ్మని బీరకాయ తొక్క పచ్చడి సిద్ధం.